قالت الفنانة ناهد السباعي إن دورها في فيلم السادة الأفاضل قائم على العمل جماعي، و«مهما زادت مساحة الأدوار أو قلت، الحكاية كلها متشابكة مع بعض».

وأضافت خلال لقائها ببرنامج «الصورة» الذي تقدمه الإعلامية لميس الحديدي، على شاشة النهار: «عُمر أهمية الدور ما كانت بمساحته، لكن بقيمته.. الفيلم مش لفنان بعينه، لكنه عمل جماعي متميز، عبارة عن مجموعة من الفنانين متقابلين في عمل، وكل واحد ليه تأثير، ولو ماكنتش هأثر ماكنتش شاركت، فالدور مش بحجمه لكن بقدر تأثيره في العمل».

وتابعت: «من ضمن أمنياتي اللي تحققت في فيلم السادة الأفاضل هو إني أشتغل مع المخرج كريم الشناوي، لأنه بيحب الممثل وبيخليه يحس إن دوره أهم دور، أنا محستش إن دوري صغير أو كبير، لأن الفيلم أحداثه بتجري في وقت قصير جدًا، وبتدور في مكان واحد، فبالتالي مفيش حد دوره صغير أو كبير، لأن الأحداث كلها بتحصل في يوم واحد».

وأكملت: «الناس كلها بتشارك وبتسلم لبعض، ومن أصعب أيام التصوير إننا كنا كلنا بنستلم من بعض ونسلم لبعض، حد داخل وحد خارج».