قالت المذيعة لمياء فهمى عبد الحميد عن والدها المخرج فهمي عبدالحميد، ان طقوس بابا فى رمضان كانت الفوازير و ألف ليلة و ليلة و التليفزيون كان بيته الأول و الأخير وجوده فى البيت كان قليل جدا كنا احنا اللى بنرحله لما نحب نشوفه، جاء ذلك خلال حوارها لبرنامج اللمة تحلى الذي يذاع علي شعبي اف ام والحلقة من تقديم شيماء السباعي.

وأضافت" طلعت فى اوبريت قمر يا قمرنا و أبريق الشاي و حاجات تانية بس فكرة وجودي فى أغاني الأطفال عنيت فيها كتير عشان بابا يوافق، و حضرت كواليس فوازير فطوطة و هو بيقول انستونا و عملت الرقصة اللى فى الفزورة و كان بيبقى عندى حالة انبهار من اللى بشوفه".

وعلقت علي اختيار والدها للفنانين بأنه "كان بياخد راينا فى كل حاجة زي الأبطال بتاعت الفوازير و الف ليلة و ليلة و لما قال على شريهان وكانت لسه ممثلة جديدة قولناله ازاى، قال انتظروا شريهان فى رمضان هتبقى عاملة ازاى، ورشحت صابرين للفوازير وروحت مع بابا الماريوت وهو رايح يقابلها و اتفرجت عليها و رشحتها لأني بحبها اوي.

وتابعت “الفوازير منطقة خطر شوية و كانت فترة و انتهت و لو اتعملت الأيام ديه مش هيبقى فيه انبهار زى زمان، و مش محتاجين يتعمل عمل عن بابا و عمرى ما فكرت فى ده و مش شايفة حد ممكن يعمل دوره، واخر حلقة فى فوازير فنون بابا كرم كل النجوم اللي اللي اشتغل معاهم فى الفوازير”.

وعلقت عن برنامجها التليفزيوني بانه “برنامج واخد طابع ديني اجتماعي و لو حاولت اخرج منه برجعله تانى، و معرفش اقيم نفسى لان انا طول الوقت بنتقد نفسى وده واخداه من بابا”