مين إللي اقنعكم وقالكم وضحك عليكم إن الواحد فينا لما يبقى قاعد لوحده ومش عاوز يتكلم مع حد أو حد يتكلم معاه إنه لازم ولابد وحتما بيكون موجوع و زعلان وعلشان نخرجه من حالته دي يبقى لازم نفضل نحاصره بالأسئلة.. مالك.. في إيه... إيه إللي مضايقك..لازم تقولي..

ياجماعة..

لازم يكون عندنا شوية سنس وإحساس أنا ممكن أكون بحب أقعد مع نفسي علشان بفكر في موضوع شاغلني ، وممكن بأعيد حساباتي في موضوع يخصني ، وممكن برتب اوراقي وبقيم مواقفي إللي فاتت ، وممكن عاوز استجم وما افكرش في أي موضوع ، الف سبب ممكن يخلوني التزم الصمت .

يبقى مفيش أي داع للتطفل و الغلاسه علشان ماتزعلوش لما انفجر فيكم ، وترجعوا تزعلوا وتلوموا وتعتبوا ، هاتقولولي ... إحنا بنحبك ومش عاوزينك زعلان .. لأ.. أنتم كده بتضغطوا علي.... وبتضايقوني ، أنا لما أكون محتاج مساعدتكم هقولكم واطلب منكم ، لأنكم بسلوككم ده بتخلوني ابتعد عن نفسي ، إللي أنا عاوز أقعد معاها واكلمها ، وده في حد ذاته بيألمني.

ياريت نعيد حساباتنا في احترام الصمت... وده اللي بيقولوا عنه " فن فهم واتقان الصمت " إفهموا بقي