ليه باب النجار مخلع...
أفضل مصمم للأزياء....
تجد أهل بيته عاديين ومش ستايل في ملابسهم.
أفضل مصمم موبيليا ...
تجد اثاث بيته متواضع واقل من العادي.
أفضل سباك ...
تجد مراته شايفه الويل من سباكة الشقة...
أفضل ميكانيكي ..
تجد مراته وعياله ريقهم نشف من كترة شكوتهم
من عربياتهم البايظه????
أفضل شيف في الدنيا ..
تجد أكله في بيته نمطي جدا ومفيش فيه اي جديد
أفضل معلمة حضانه ..
تجدها متوترة ومندفعه وعنيفة مع أولادها
مابتعرفش تتعامل معاهم وعنيفه عليهم
خدوا بقى من ده في كل التخصصات والمهن
ياترى ايه التفسير النفسي للموضوع ده....
في مثل شعبي مصري قديم بيقول...
باب النجار مخلع...
لأن الناس القريبين من النجار مراته وأولاده
في الغالب بيكونوا مش عارفين قيمته الكبيرة في النجارة
اللي غيرهم طبعا عارفها كويس قوي ( الزباين)
لذلك دائماً ما يحرص على جذب إهتمامهم..
بصناعته الرائعة وابداعه لأنه بيشوف صورة ذاته الحلوه.
في تقديرهم وتثمينهم للي بيصنعه
لحد كده الكلام تمام.....
يعني بيحاول يرضي توقعات الناس اللي عارفين قيمته
تعالوا بقى نشوف تقدير الناس اللي عايشين معاه
مراته..اولاده..اقاربه..معارفه...
تجدهم في الغالب مش شاغلين بالهم بتميزه وعمله
ومابيكونوش عارفين كويس مهارته الكبيرة
علشان كده.بيبصولوا نظره عادية.
ده جوزي..ده ابويا...ده قريبي
اهي النظرة البسيطة العادية دي ...
هي بدايه إهماله ولامبالاته وهو معهم
وكأن لسان حاله النفسي الداخلي بيقول.... أعمل ليه وأجود ليه وأطور ليه
إذا كان هم مش عارفين قيمتي...
( أنا أعمل للي بيعرف قيمتي ويقدرها )
وبمرور الوقت تتحول دافعيته الضعيفة..
إلى اهمال ثم امتناع ورفض عن مشاركته في تصليح بابه المخلع. ..
هنا مربط الفرس والكلام...لو الناس اللي حوالين النجار
حسسوه بقيمته وعرفوا قدره وأثنوا عليه ومدحوه
أكيد و يقينا هيحاول يرضي توقعاتهم الطيبة فيه
وهنلاقيه ساعتها بدل ما يقوم بتصليح الباب المخلع
ممكن نجده قام ورماه وتخلص منه.وصنع باب تاني من أجمل ما يكون
ليحصل على الثناء والمديح والتقدير منهم.
عرفنا دلوقتي معنى المثل الشعبي...
الشيخ اللي بعيد سره باتع
ومزمار الحي لا يطرب. ...
ولا كرامة لنبي في وطنه...
امدحوا القريبين منكم.. تاخدوا منهم أجمل الأشياء.