أب خبيث لما بيدخل في صراع ومشاحنات مع مراته.. ومايقدرش يغلبها ...لأنها شديدة عليه. وكاسره سمه أول بأول.. عارفين بيحاول يكسرها ويشوه صورتها ازاي وبطريقه شيك وسهله.. والغريب ماحدش يقدر يقوله تلت التلاته كام ولا يقدر حد يغلطه ولا يشيله العيبه.... بيعمل حاجه خبيثة وبسيطه قوي.. كل مايشوف مراته شخطت او ضربت.. ابنه أو بنته. وهى بتربيه طبعا على اي حاجه غلط الولد بيعملوها

يقوم هو بدل مايؤيدها ويدعمها ويشد أزرها..علشان الأوامر والنواهي التربوية السلوكيه تحقق أهدافها.. يقوم هو بخبث ومكر غير عادي.. ينتقدها قدام العيال.. ليه بتشخطي فيه..ليه بتعلي صوتك عليه..ليه بتضربيه. وياريت يقف الموضوع عند الحد ده..

لأ...

فجأة تلاقيه مبتسم في وش المحروس ابنه أو بنته.. و هواك يادلع ومحن ومياصه معاهم.. كأن الوليه امهم امنا الغوله والبطة السودا.. ومش بعيد ينزل يتمشى بيه في الشارع.. على غير عادته لما بيكون في البيت... ويجيبلهم كل اللي نفسهم فيه.. شوفوا بقى الخبث في الموضوع فين... لو حد قاله إنك كده بتكسر كلام مراتك.. وبتخلي صورتها مهزوزة وضعيفه في نظر عيالها.. وبتطلعها هفء وكلامها مالهوش اي لازمة.. قدام ولادها.

هيقولك وعينيه متفتحه قد كدة.. يعني أنتم عاوزين أموتهم وادبحهم كمان علشان ارضيها.. مش كفايه هى عليه... هى المفروض بتشد وأنا بأجذب... وحياة أمك الكلام ده تقوله لواحد مش فاهم ومش دارس ومش متخصص.

من الآخر كدة.. أنت نيتك مش صافيه ناحية مراتك.. ومش قادر تخلص حقك منها لأنها كابسه على نفسك.. يعني من الآخر...عاوز تشوهها عن طريق استقطاب العيال في صفك ضدها.. مرة مع التانية مع التلاته.. بتكون عملت انت وابنك وبنتك جبهه ضدها.

عرفتم دلوقتي.. ليه الأولاد والبنات دائمآ مايبحثون..عن مبررات لتبرئة موقف ابيهم ضد أمهم.. حتى لو كان الأب ظالمها ظلم بين... اخطر ما يحدث داخل الأسر المصرية الآن .. ظاهرة استقطاب كل من الأب والأم لبعض أولادهم معهم.. لتكوين جبهات للصراع ضد بعض داخل الأسرة عن ظاهرة التثليث الأسري في مجال العلاج الأسري اتحدث

#مجرد _خاطرة