• الرئيسية
• مقالات

عيشك يحلى لي يا خالي… قال: من سوء بختي يا ابن أختي!

مثل شعبي مصري أصيل، معناه إن الواد بيمدح خاله و"يبرشط" عليه علشان ياخد منه اللي هو عايزه (بيستذكى/بيستنصح).

والخال طبعًا راجل مدقدق وناصح، وفاهم إن ابن أخته بيبرطش وواخد باله من الفولة واللعبة، وما دخلتش عليه. قام رايح قايل له:
"ما هي حلاوتي دي من سوء بختي يا ابن أختي!.

في ناس كتير حواليك بيمدحوك ويعددوا محاسنك على الفاضي والمليان، لما تكون لهم مصلحة عندك. ولما المصلحة تخلص… يدوك وش الضيف!

يا ريت تكبر دماغك منهم وما تتغرّش بمعسول كلامهم. الناس دي بتمدحك مش علشان إنت حلو وجميل…
لأ، علشان مصلحتهم عندك. ولو راحت المصلحة دي، يبقى تعالى قابلني لو حتى شوفتهم!

أوعى تزعل منهم لو تجاهلوك بعد ما مصالحهم تنتهي، لأنهم ببساطة ناس ما تستاهلش تزعل عليهم.
لو عايز تزعل… ازعل على نفسك إنك صدقتهم واتخدعت فيهم.

المرة اللي جاية، يا ريت ما تديهمش وش، وكنسلهم، و"دَلِّتِم" أول بأول، علشان تضمن إن الهارد بتاع دماغك يفضل مستريح، ما يهنّجش، وما يحتاجش سوفت وير!