أكد الفنان باسم سمرة على أنه فخور بكل الأدوار التي قدمها، وإن لم يخطئ فلن يتعلم، حيث قال خلال لقائه ببرنامج “واحد من الناس” مع الإعلامي عمرو الليثي: “أنا فخور بكل شغلي ولو أنا مغلطتش مش هعرف أصلح من نفسي وموضوع أن الإنسان كامل ومبيغلطش دا كذبة”.

ومن جانبه، تطرق باسم سمرة في حواره مع الإعلامي عمرو الليثي إلى الحديث عن دوره في فيلم “عمارة يعقوبيان”، حيث قال: “أنا عملت فيلم عمارة يعقوبيان كنت عامل دور عسكري أمن مركزي وكان دور جريء جدًا والفيلم دا هو تقريبا ليا أو للأستاذ خالد الصاوي كان هو سبب شهرتنا”.

وتابع قائلًا: “بالرغم من أن دوري كان محل انتقاد ومش أي حد يعمل دور زي دا، يعني لازم تبقى واثق في نفسك ومتمكن من أدواتك عشان تعرف تعمل دور زي دا وتبقى شخصيتك قوية عشان بعد الدور تعرف تواجه الناس.. وساعتها مقلقتش من الدور خالص، ازاي يبقى معايا عادل إمام واقلق، ودا كان مصر كلها في الفيلم زي الأستاذ نور الشريف الله يرحمه، اقلق ازاي دي كانت فرصة جميلة”.

وأضاف باسم سمرة في حديثه عن مشاركته في فيلم “عمارة يعقوبيان” قائلًا: “لما قرأت الرواية كان نفسي أعمل دور البواب اللي كان عامله محمد إمام بس لما مروان حامد اختارني في الدور التاني فالأول اتخضيت ولما قريت كويس اكتشفت أن الدور أصعب وهو دا اللي هيسيب علامة ودا اللي حصل وأستاذ عادل إمام أشاد بيا إشادة عظيمة”.

ومن ناحية أخرى، أعرب الفنان باسم سمرة عن استيائه من تدخل الرقابة في مشاهد مسلسل “صديق العمر”، حيث قال: “أنا ضد الرقابة، يعني أنا رأيي أن الممثل يبقى رقيب على نفسه أو متبقاش رقابة سياسية تبقى رقابة أخلاقية يعني تبقى حاجة ليها دعوة بعاداتنا وتقاليدنا بس متبقاش سياسية، مش عشان حاجة مش عاجباك فتلغيها، وأنا مش بدخل في مشاكل مع الرقابة، اللي بيدخل هو المخرج”.