يعنى هو أنا ينفع دلوقتى أسالك اسم أمك إيه؟.. وتجاوبنى عادى ؟!.

أكيد لأ، ده انت مش بعيد تتهمني بإنى شخص عديم التربية منحدر  الأخلاق مابفهمش في الأصول وعيار أخلاقي فلت خلاص، وتسمعنى شوية كلام زى السم.

ولو كنت عصبي حبتين ممكن ترفقهم بـ"بوكسين" ومعاهم تحذير بعدم تكرار هذا السؤال مدى الحياة خوفًا على عيناك اليمين والشمال من الخلع، ووضع لمبتين جاز مكانهم لدواعى الحرق.

والرسالة اللى وصلت لنا من الجملتين اللي فاتوا دول بتأكد لنا إن الأم عندنا "خط أحمر" لأ مش خط واحد دى خطوط، يعنى تيجى عند سيرة الأم وتبقي هذه  المنطقة ممنوع فيها الإقتراب أوالتصوير، مع إنى شايفة إن السؤال عن اسم الأم شىء عادى جدا وبسيط ومشروع، بس إحنا نظرا لما تحمله الأم من مكانة عظيمة دخلنا اسمها في منطقة الألغام اللى فى أى لحظة ممكن ينفجر فى وشك.

العجيب بقي واللى بيضحكنى في نفس ذات الوقت إنك لما بقيت تختلف مع أى شخص فى وجهة النظر بتبقي أسهل حاجة تكسره بيها هي سيرة أمه اللى بتصفها بأبشع الألفاظ سواء كنت تعرف أم هذا الشخص أو لأ، طيب لو مش عاجبك تصرفات شخص أو بتنقد أخلاقة إيه اللى بيدخل أمة فى الموضوع ؟ّ.

تقصد يعنى علشان هى اللي مسؤلة عن تربيتة ؟!.. طيب ماهى أم حضرتك أعتقد نسيت تركز فى تربيتك لإن اختلافك مع الأشخاص لايعطيك الحق إنك تسب أو تلعن أو تهين أمه.

تخيل معايا كدا كم الاستياء النفسي اللى بتوصله الأم لما تسمع إهانتها،  أو تخيل كم الوجع اللى بتحسة عائلتها لما تسمع إهانتها وهى عند خالقها؟، يعنى إحنا حاطين الأم فى المنطقة المحظورة، وفى نفس الوقت بنخرجها منه لما نحب بإرضاء غرورنا المريض؟!.

اختلافك مع فلان لايعطيك الحق مطلقا فى إهانة أمه أو أخته أو أى سيدة تخصة، اختلافك لازم يكون مع الشىء اللى بيقدمة أو التصرف اللى أخطأ فيه، لكن السب بالأم والتشكيك فى سلوكيات الأخت والابنه والزوجة أعتبرها تصرفات أشخاص ناقصة بكل المقاييس.

الأم اللى إنت أهنتها وأساءت إليها بسبب تصرف خاطىء من أحد أبناءها دى بتخلي شكلك ووحش قوى وقليل قدام نفسك لما إبنها مايردش عليك ويسب الست والدتك زى ماانت عملت  ،بيخليك تقول لنفسك هو أنا اللى أهنت نفسي وأمى ولا إيه؟!.

كفاية بقي إهانة لسيرة الأم والأخت وستات الكون كله واستغلالهم فى خلافات خايبة، لما تحب تختلف مع شخص اختلف مع تصرفة ومع ما يقدمة وكفاية بقي تشويه للسمعة، ولاخلينا بقي نفتحها عالبحري، واللى يجيب سيرة أمك تجيب سيرة أمه وتبقى مهزلة أخلاقية عظيمة؟!.

 ولامؤاخذة كدا علشان إحنا توهنا منكم.. سيرة الأم "خط أحمر" ومنطقة محظورة زى ماعلمتونا  ولا متاحة ومباحة فى المواقف اللى بتثير غضبنا؟!.

وفى النهاية : هل لدينا أفعال أخرى متدنية ولا خلاص شطبنا ؟!.