نمط من الناس ،لسانه وكلامه زي العسل ، ممكن يعملك البحر طحينه ، لما يكلمك يحسسك إنك مفيش غيرك إللي متربع على عرش قلبه ، ويفضل يمدحك ويقول فيك أشعار ، لحد بس ما ياخد إللي هو عاوزه منك ، وأبقى تعالى قابلني لو شوفته أو سمعت حتى صوته

منفعجي مصلحجي من الطراز الأول .. أول ما تشوف إسمه بيرن على موبايلك بعد فترة انقطاع ، أعرف على طول إنه عاوز منك مصلحة وهيدخلك بمدخل إنت وحشتني قوي ، والكلمتين إللي ما لهمش لازمه دول ، وبعدين يقولك أنا محتاج منك.. كذا وكذا.. النوع ده من الناس ، مابيعرفكش علشان نفسك ، ممكن يعرف إنك تعبان ومتأزم وموجوع ، ومايفكرش مرة واحدة يسأل فيك أو عليك ، طبعا كلنا بنتكسف نواجه البني أدم ده.

أنا عاوزك مره..

تجرب تحط البني أدم ده قدام نفسه ، لما يجيلك بعد فتره يطلب حاجه منك ،ياريت تقوله إنت ليه ما بتسألش عليا إنت تعرف الفترة إللي فاتت دي حصلي كذا وكذا وكذا...وتقوله مواقف ايجابيه وسلبيه..لا سمعت صوتك بتبارك لي .. ولا بتواسيني.. ولا حتى بتطمن عليا ،هو أنا رخيص وقليل قوي كده من وجهة نظرك ، لدرجة إنك ماتسالش عليا ،طيب لما أنا كده.. إنت جاي ليا دلوقتي ليه ،اعتقد إن حوار بالشكل ده ممكن يخليه يفوق ، ولو مافاقش يبقى شخصية متبلده ساعتها قوله ، أنا ممكن اخدمك في إللي إنت عاوزه مني ، بس مش هخدمك ولا هقدملك الخدمه إللي إنت عاوزها ، لما تعرفني علشان نفسي.. أبقى أعرفك علشان مصلحتك.. زوق عجبك ياخفيف... فقليل من المواجهه الصادمة لايضر .