ناشد الإعلامي محمد موسى، المواطنين بضرورة اتباع تعليمات الدولة وجميع الإجراءات الاحترازية ضد وباء فيروس كورونا كوفيد 19، لتخطي الأزمة وعودة الحياة مرة أخرى إلى طبيعتها في أسرع وقت لافتا أن هذا الأمر مترتب على مدى وعي المواطنين بخطورة الوباء.

وتابع «موسى» خلال برنامجه "خط أحمر" المذاع عبر فضائية الحدث اليوم، "ضروري أفكركم بمعركة ضروري نخوضها وإحنا واثقين أن ربنا واقف معانا، أه ربنا واقف معانا جدا، في معركتنا في مواجهة فيروس كورونا اللعين".

أضاف: "لكن واحنا بنخوض المعركة دي لازم وعينا يبقى على قد هذا البلاء ولازم نبقى فاهمين نتائج هذا الوباء علينا واللي منها الشلل اللي أصاب السياحة المصرية ونفتكر أن عندنا أكثر من 1200 فندق بهم أكثر من 250 ألف أوضة مهجورة متفتحتش بسبب هذا الفيروس وشواطئنا مفيش كرسي محطوط عليها وأن فيه أكثر من 13 % من حجم سوق العمل في مصر اللي هما بيشتغلوا في قطاع السياحة قاعدين في البيوت وأن خسرنا أكتر من 8 مليون سائح والخساير دي هتستمر لو إحنا معملناش اللي علينا كمواطنين وإلتزمنا بالتباعد الإجتماعي ووقف التجمعات سواء بالشوارع أو البيوت".

استطرد: "الدولة دعمت قطاع السياحة بـ 3 مليارات جنية يعني بتبذل أقصى جهد ممكن يبذل عشان تعدي بنا لكن إحنا ناس مقصرة.. أيوه أحنا مقصرين جداً والسياحة مش هترجع لو ملتزمناش بالإجراءات المفروضة لمواجهة الأزمة".

تابع: "عايز كمان أفكركم إن العمالة غير المنتظمة اللي بتكسب قوتها يوم بيومه واللي عددهم ضخم جدا ودلوقتي في البيوت وده بسبب ارتفاع الإصابات اللي ناتج عن الإختلاط اللي رفع نسبة الإصابة بهذا الوباء اللعين والناس دي مش هترجع تشتغل تاني لو إحنا مبتزمناش لحد ما نعدي الأزمة وخليننا نفتكر أن الدولة عملت اللي تقدر عليه ناحيتهم على قد ماقدرت ودعمتهم بـ 3 مليارات جنيه ولكن الوضع مش هيتعدل إلا لو إلتزمنا شويه في بيوتنا الفترة دي إحنا في ذروة انتشار العدوي زي ما كل الخبراء بيقولوا لو عايزين نطلع بأقل الخساير يبقى نقعد ومننزلش من بيوتنا إلا للضرورة دورنا مهم كفاية استهتار ياجماعة كل يوم بنفقد ناس غالية عندنا".