لازم يلعب دور الأب والابن مستحيل تقدر تجيب له فنان قدير يمثل دور أبوه تحس كدا ياجدع أنه مش هيأمن لحد غيرة يقوم بهذا الدور تفاصيل الأب جواه مختلفه عن أى ممثل تانى بيبقي هو الوحيد اللى فاهم جوانيات الأبوه فى العالم علشان كدا قافش دايما فى ظهورة بشخصيتين أب وابنه أخ واخته المهم محمد رمضان ماينفعش يطلع لنا بدور شخص واحد فى مسلسلاته ، ، وأحب أبشركم أنه لو جت له الفرصه ومسك القلم وكتب أراهنكم أنه هيكتب لنفسه كل الأدوار حتى النسائى منها وأدوار الأطفال.

غالبا كل اللى كتبوا مسلسلات لمحمد رمضان بيكتبوا له تحت تهديد السلاح إحساسي بيقولى أنه بيبقي قاعد جنب المؤلف وماسك له مطواه قرن غزال علشان يحط له التفاصيل اللى هو حابب يمثلها ، عنده قدرة رهيبه يا أخى تخليه ياخد المؤلف ويروح بيه على حتته وسكته .

زلزال ده اسم المسلسل الرمضانى اللى بيقوم ببطولتة نمبر وان التمثيل زى ما أطلق على نفسه الفنان محمد رمضان، مكدبش عليكم لما سمعت إسم المسلسل قولت فى عقل بالى هاتفرج على حاجه هتزلزل كيانى من جوه، بس يا فرحه ماتمت ، سيناريوا كل عام يتكرر ، من الحلقه الأولى تقدر تلم تفاصيل المسلسل كله وتحرق كل تفاصيله .

محمد رمضان عنده طقوس معينه كدا هتلاقيها فى كل مسلسلاته لو ماعملهاش البركه ماتحلش ويحس ان النحس هايركبه ياحبة عينى أول طقس أنه لازم يقلع لو مقلعش فى أول حلقه يتشاءم ياجماعه أعتقد إن ده ندر بيوفيه فياريت مانظلمش الراجل ونحترم طقوسة ، نيجى لباقي الطقوس واللى أهمها المشهد الساخن بينه وبين البطله ، ومشيته المميزه المكرره بالإضافه إلى بعض مشاهد الأكشن وتقييده بالسلاسل وقدرته على التخلص منها ، حبه كدا خيال علمي ، وطبعا مانقدرش ننسي صوته اللى بيخشن فجأه وكأنه جاى يثبت لنا رجولته داخل العمل .

محتوى مسلسلات محمد رمضان واحد نقدر نقول إن اللى بيتغير بس هو إسم المؤلف، نمبر وان مش قادر يطلع من دور الشاب البسيط اللى دايما الدنيا جايه عليه ، ولازم يبقى له ثأر مع البطل الشرير اللى بيقوم بدورة الفنان ماجد المصرى ،اللى أكيد هايتسبب فى دخوله السجن ، وغالبا هايحب بنته الوحيده ولما يقرر يطلب إيديها هايترفض ، فايخرج من السجن ويقرر ينتقم من كل اللى ظلموه بعد مايبقي غنى غنا فاحش ،استنوا نسيت أقولكم إنه لما هايترفض من ماجد المصرى وبنته هايحب البنت الغلبانه اللى علي قد حالها اللى قامت بدورها الفنانه حلا شيحه ،هو أنا ليه حاسه إنى شوفت السيناريو ده قبل كدا فى مسلسلات الأسطورة .

أعتقد إن محمد رمضان سجن نفسه جوه دائره عمال يلف فيها كل سنه بنفس الشكل والأداء ،السؤال هنا هل الفنان مش قادر يخرج من الدائره دى ولامحدش قادر يخرجه ،ولا هو حس ان ده بيأثر فى الناس بما إننا يعنى شعب عاطفى وكدا.

سؤال صغير للفنان محمد رمضان ومحتاجه له رد ،هل أنت فنان لفئه معينه ؟! يعنى إنت ماتعرفش تلعب شخصية خارج هذا الإطار، يعنى مفيش نماذج إيجابيه هتاكل معاك ، يعنى أنت لو كافحت كفاح شريف مثلا هتتحرق ، ولا لازم الدنيا لما تقسي عليك تحولك لوحش.

لا أختلف على موهبة هذا الفنان الموهوب المميز ، ولكن كل ما أريده هو أن يستغل شعبيته فى تقديم نماذج شبابيه مقبوله تصبح حافزا لمحبيه ويصبح بها قدوة لمتابعيه .

الجدير بالذكر أن الحسنه الوحيدة اللى لفتت نظرى وبشهادة من تابعوا الحلقه الأولى أيضا هو الممثل الذى قام بدور محمد رمضان الابن فحضورة الطاغى وخفة ظله يبشران بمستقبل مميز له فى عالم التمثيل .

محمد رمضان لم يضف جديدا فى هذا العام سوى اسم جديد لعمل مكرر ذكرنا بزلزال 1992

تعدد كتاب السيناريو لمسلسلاته والمحتوى واحد .