إيه موقفك..لو كنت قاعد في مطعم فخم.. في دولة أوروبية كبيرة..وحضر الجرسون.. وقدملك المنيو.. علشان تتغدا وتختار أكلة منه.

الأكلة الأولى... جنين البط جوه البيضه.. طبعا زمانك عينك فتحت... وإيدك على راسك ومش مصدق... لأ صدق ونص.. أنت عارف اللي جنبك ده بياكل إيه.. أهو بياكل بيضه جنين البط الميت..، وماسك معلقة وبيمزمز في فرخ جنين البطة.

عارفين الأكلة دي اسمها إيه..اسمها البالوت مشهورة في فيتنام وكامبوديا والفلبين الأكلة التانية.. شوربة عش الطيور... زمانك دماغك لفت ودارت... وبتسأل واحد جنبك في المطعم إيه الشوربه دي.. أنا كل اللي اعرفه شوربة العدس واللحمة والفراخ..

أقولك الشوربة دي عبارة عن إيه.. في نوع من العصافير اسمه طائر السويفتليت.. لما بتبني العش بتاعها، بتتف وتطلع اللعاب وبتخلطه مع العشب واغصان الشجر.

بعد كده المطاعم بتاخد العشوش دي،.. وتدوبها و تعملها شوربة والطبق بيوصل تمنه ٢٠٠٠ دولار.. طبعا زمانك قرفت وقولت للجرسون .. مش عاوز اطفح هاتلي فنجان قهوة..

طيب أنت عارف القهوة اللي هجيبهالك دي اسمها إيه... اسمها كوبي لواك اغلى قهوة في العالم ومصنوعة من براز قطه اسمها الزباد في إندونيسيا، القطة دي مابتاكلش طول حياتها ... غير الكرز وعصير التوت.

والبراز بتاعها بيتم تجفيفه وتعبئته .. هى دي القهوة اللي هتشربها.. بس خد بالك تمنها غالي قوي.. الكيلو منها بيتباع ب ٧٠٠ دولار... أنا تعبت ومش عاوز أكل.. أنا هروح لامي تعملي شوية رز وبسله بالجزر واشرب كوز ميه وأنام.

مجرد خاطرة