بمناسبة اليوم العالمي للمرأة... وراء كل رجل عظيم امرأة...عبارة مستفزة...والغريب إننا بنرددها دون معرفة مغزاها ..يعني إيه تفضلي وراه تكبريه تطوريه.... وأنت قاعده وراه  في الضل .... ليه ماتكونيش جنبه مش وراه.

على الأقل وجودك جنبه هيخليكي تشوفيه كويس تعبيراته وتغيراته ومظهره وأثر نجاحه وفي الغالب علشان أنت وراه.. مابتشوفيش أي تغيير أو تعديل بيحدث له..وبتكون المفاجأة غير السارة.. إنه بيتعود.مايشوفكيش...لأنك على طول وراه.

هيطلعللي مئة فزلوك ومتفزلك ومتفلسف.. و يتحفنا ويقولنا بس هى دي طبيعتها كده..إنها تضحي وتنكر ذاتها علشان راجلها ماشي..مصدقينك... ياعم الجامد أومال تضحيتك أنت علشان طموحها هى فين.

ليه ماتكونش أنت كمان وراها.. زي ما أنت عاوزها على طول وراك.. اشمعنى هى اللي على طول وراك أنت عارف لو غيرنا الصيغة.. وقولنا بجانب كل رجل عظيم امرأة.  إيه اللي هيحصل.

هيحصل إن أي واحد فيهم هيكبر..هياخد ويشد التاني معاه.. ساعتها هنلاقيكم أنتم الاتنين كبرتوا مع بعض لكن لو هى وراك على طول هتيجى لحظة .. ومن كتر ما هو شايف ومركز على اللي قدامه بس..إنه هينسى كل اللي وراه... لأنه مش هيفضل طول الوقت باصص للى وراه.

عرفتم ليه رجال كتيرأول مابيوصلوا.. بيحرقوا كل ماضيهم... بما فيهم اللي وقفت معاهم ووراهم.. ساعتها بقى .. ياترى هنجيب الغلط على مين... على اللي كبرته..وإلا اللي تكبر عليها.. كل سنة وكل امرأة مصرية بخير... أمي..زوجتي..ابنتي..حفيدتي..طالباتي

#بجانب كل رجل عظيم امراة#.

#وبجانب كل امراة عظيمة رجل#

#مجرد _خاطرة