*الناس اللى زعلانه بعد ما شافت بروموهات مسلسلات رمضان وشعروا انها كلها شكل بعض بسبب انها كلها عضلات وشناب ودقون عايز اقولهم عندكم حق طبعا لان من حقك عزيزى المشاهد أنك كل عمل تشوف البطل اللى بتحبه وبتابع شغله وتستناه بشكل جديد ولوك جديد فى كل عمل عن التانى .. بس ده طالما محصلش يبقى تعرف ان فى حاله استسهال وركوب موضه ان الشكل ده نجح مع الممثل الفلانى وعشان نضمن النجاح يبقى لازم نعمل زيه عشان نضمن ننجح زيه .

* الناس اللى زعلانه ومش فاهمه ليه مسلسل نجم نجوم مصر والعرب النجم الكبير عادل امام وقف لاسباب غير معلومه خاصه وانه بصحه جيده (ربنا يطول فى عمره ويعطيه الصحه ويمتعنا كمان وكمان ) احب اقولهم عندكم حق طبعا لان دراما رمضان المفترض انها تقوم على فكره التنوع فى المحتوى وعادل امام ضلع كبير فى التنوع ده خاصه وانه بيعرف يختار المواضيع اللى بيقدمها ..ولما تخسر الدراما التليفزيونيه ثلاثة من اكبر النجوم زى استاذ عادل امام واستاذ يحيى الفخرانى واستاذ صلاح السعدنى وزيهم اسماء كبيره زى نيللى كريم ويسرا ... الخ ، من هؤلاء النجوم يبقى اكيد فى حاجه غلط ومش مفهومه ويارب حد يفهمنا ليه ده حصل ؟ .

* الناس اللى زعلانه بسبب تراشق بعض مخرجى الاعمال الدراميه مع مؤلفين هذه الاعمال ومحاوله البعض بنسب الاعمال لنفسه كتابه واخراج احب اقولهم عندكم حق لان اختلاط الحابل بالنابل اللى حاصل وبيحصل ده يعطينا مؤشر اننا هنتفرج على سمك لبن تمر هندى .. ويطمنا اننا بدل ما هنتفرج على ابداع أثناء عرض الاعمال هنقعد نتفرج على خناقات وشرشحه البعض فى وسائل الاعلام وكل واحد فيهم بيقول انا اللى عملت ولوحدى فده مش كويس لان المثل اللى قال " اعطى العيش لخبازة " مغلطتش وكل واحد يخليه فى منطقته عشان خاطرنا وعشان نشوف حاجه كويسه فيها صنعه وحياه ابوك منك له .

* الناس اللى زعلانه على رحيل استاذ نور الشريف وحاسه ان الراجل لم يأخذ حقه فى التكريم والمكانه بعد وفاته احب اقولهم عندكم حق طبعا .. وبما اننا حاليا فى ذكرى ميلاده احب اقول ان استاذ نور الشريف كان مدرسه كبيره فى الاداء ومدرسه متنوعه تواكب كل عصر وكل جديد يطرأ على مدارس الاداء التمثيلى .

نور الشريف رحمه الله عليه كان بطل درامى بحق منذ البدايه لحد اخر المطاف اختياراته لمواضيعه فى السينما والتليفزيون وحرصه على تقديم كل جديد وحرصه على الوقوف بجانب كل ممثل جديد فى بداياته وحرصه على تقديم مؤلفين ومخرجين بل ومصورين جدد دائما فى كل اعماله وحرصه الدائم على نقل خبراته وتجاربه لكل من يعمل معه وهذا ما نفتقده الان فى الصناعه .. نور الشريف كان جامعه فنيه منفصله لها طعمها الخاص وشكلها المختلف .. رحم الله هذا العملاق الكبير وربنا يحسن مثواه بقدر ما أسعد الملايين خلال مشوار طويل حافل بالنجاح والجهد المتميز .. فى ذكرى ميلاده تعالوا نتذكر أعماله ونذكره بالخير ونترحم عليه اللهم ارحمنا دنيا واخره .