عزيزى الشاب انت زى ابنى وهدخل ف الموضوع على طول وبدون اى تمهيد .. ومش هقولك مفروض نحترم رأى الأغلبية اللي قالت نعم للتعديلات الدستورية لانك فورا هتقولى ان فيه تزوير والورق ورقهم ومش هستغرب لو اقسمت انك شوفت التزوير بعيونك ..!!

المهم انا هكلمك فى موضوعين بسرعه كده .. الموضوع الاول اننا وبعد ما انتهى الاستفتاء وبقى عندنا دستور محترم فانا معاك ضد الحكومه .. ايوه ضد اى حكومه .. لان اساس عملنا الصحفى المسموع والمكتوب والمرئي هو النقد والاعتراض البناء طبعا .. وانا حقيقي بطالب بحكومة اللامستحيل زى دولة الإمارات حتى لو ظروفنا صعبه ومعندناش مواردهم .. وبطالب بوزاره للسعاده زى ال فى دبي .. وكمان عاوزين هيئة ترفيه حقيقيه زى السعوديه .. لأن الشعب المصرى تعب ومر ومازال بظروف حياتيه ونفسيه قاسيه جدا بسبب الخراب العربي المزعوم ..!!

وطبعا الأهم من كل ده ان انا وانت بنطالب حكوماتنا اننا كمصريين نعيش مستورين .. وكلنا رافضين جنون زيادة الاسعار .. ولازم نتعاون كلنا فى محاربة الغلاء والظلم والاستغلال وكل أنواع الفساد .. !!

معاك وبطالب بشده ان من حقنا نرفض أن مصريبن زينا يعيشوا بالمقابر والعشوائيات زى مارفضنا تعذيب القطط والكلاب والحيوانات ..!!

من حقنا انا وانت عزيزى الشاب نرفض كل وزير او مدير فاشل او مرتعش ومتردد وخايف ياخد قرار لصالح ابناء بلده وكل همه مكاسبه وبس .

من حقنا حاجات كتير وقادرين اننا نحققها وانا على يقين اننا هنعمل ده .

اما الموضوع الثانى ياصديقى الشاب وبالعقل كده بقولك لو اعتراضك على شخص الرئيس .. وشايف استمراره لـ 2030 مش صح .. هقولك بكره الأيام تثبتلك ان ده أفضل قرار أخده المصريين وباغلبيه ساحقه .. لان الشعب الطيب ده فاهم بفطرته ازاى ومين يقدر يحافظ على بلدنا .. وهاتلى من التاريخ رئيس او حاكم ومن ايام محمد على قدر يبنى بلده ويطهرها من الفساد والفهلوه والجهل والمرض والظلم الاجتماعى وغيره فى 4 سنوات فقط ..!!!

وعموما انا معك وهحترم رغبتك ورايك وارادتك .. لانى واثق ان هدفك صالح بلدنا .. رغم انك بينك وبين نفسك متأكد ان مفيش تزوير حصل وان استمرار السيسي رغبة الشعب المصرى العاقل والفاهم رغم كل الظروف .. وسيبك من الكلام الاجوف لبعض المضحوك عليهم خاصة الشباب صغير السن والتجربة واللي بعتبره ضحية اعلامنا الكسول والتقليدى المستمر بنفس الخطاب الإعلامى القديم والعقيم ومبيخاطبش شباب النت والسوشيال ميديا بلغتهم وأسلوب تفكيرهم وده موضوع آخر وله حديث اخر .

المهم خلينى اسالك انت مقتنع او مصدق كم الشائعات العجيب والابله ده .. ال بترددها قنوات الخونه وكتائبهم الالكترونيه على مدار اليوم .. لدرجة انهم فضلوا يكدبوا لحد ماهم نفسهم صدقوا كدبهم .. وبقوا بيكدبوا فعلا بمنتهى الصدق !!

وهناخد مثلا مثلا كدبه عبيطه زى كلمة صفقة القرن اللي بيقولوها وكأنها اتهام وواقع وحقيقه .. وهنا عاوز اسالك بجد .. الصفقه دى ايه وليه ولمين .. قالوا انها منح ارض من سيناء للفلسطينيين بموافقه مصريه وتمويل خليجى ورعايه امريكيه .. وكل ده علشان الهانم إسرائيل تنعم بالسلام والرخاء والسعاده .!!!

بالله عليك انت مصدق الهبل ده .. ومش زعلان من نفسك وانت ساعات بتردده معاهم بدون فهم .. هى اسرائيل ناقصها ايه من السعاده والرخاء .. وايه الفرق بين الخطر المزعوم اللي بيهدد اسرائيل من الفلسطينيين سواء كانوا فى غزه او فى سيناء .. الاثنين على حدودها وبالعكس الخطر هيكون اكبر لو ده حصل .. !!

طيب سيبك من ده وقولى الخليج هيمول ليه .. وهيدفع لمصر زى ما قالوا 400 مليار دولار ليه .. ايه السبب القوى والقاهر ده اللي يخلى دول الخليج تدفع كل ده .. ده ساعتها مصر تبقى ساذجه لو رفضت .. لانها هتاخد كل المليارات دى وتنعش شعبها مقابل صحرا مش مستفيده منها شئ .. زى ما اى أب ممكن يبيع قيراطين بور من ارضه علشان يجوز ولاده .. يعنى صفقه كلها فوائد لمصر لو حصلت .. وهى طبعا مستحيل تحصل لأسباب كثيره جدا .. اهم الأسباب دى وبكل وضوح ان اسرائيل ووراها امريكا بلطجى العالم تقدر تحاربنا وتاخد الكم كيلو دول ال هيحلوا المشكله وتاخد هى المليارات دى لنفسها .. اللي مش عارف ليه هتدفعها دول الخليج اصلا .. !!!

وسيبك بقا يا معلم من كل ده وهات ودنك وركز معايا فى الكلمتين الخلاصه وربنا يستر علينا ويجعل كلامنا خفيف على الانظمه العربيه كلها .. لو سيادتك بتفهم سياسه هتفهم ان أفضل حل للقضية الفلسطينية من وجهة نظر بعض السياسيين هو اللاحل .. ايوه متستغربش لانهم 100 سنه شاغلين شعوبهم بها .. والحاجه الوحيده ال بيتفق عليها كل نظام مع شعبه .. يعنى فزاعه زى الفل لأى نظام ومش مكلفه .. هم كلمتين وكم شعار يقولهم الرئيس .. انا اقصد اى رئيس من اياهم طبعا .. وبيبقى الزعيم والبطل وخليفة صلاح الدين الايوبي .. !!

يعنى من الاخر يا صديقى الشاب قبل ماتصدق شائعات الصفقات الوهميه دى ياريت تشغل مخك ثوانى قبل ماترددها مع الخونه وتجار الاوطان لانهم مستفيدين من تجارتهم وكدبهم وخيانتهم .. لكن انت مستفيد ايه !!!