الست اللي بتولد...الله يكون في عونها....

ياريت تبعدوا عنها شويه وتسيبوها في حالها

كفاية اللي فيها مكفيها

مش هقول جروح في جسمها وسلك وألم ..

ولا هقول مش قادرة تمشي ولا تتحرك....

ولا هقول نفسها التعبانه علشان صورة جسمها.

أنا هتكلم على أعراض الإكتئاب عندها..

لأن في أزواج كتير لسانهم طويل ومعندهمش

اي معرفة بإكتئاب مابعد الولادة.

ونازلين مص دم لزوجاتهم..

وبيقولوا على زوجاتهم انهن اصبحن نكديات

بص يا سيدنا... منك ....ليه

علشان بس متقولش إن مراتك بقت مريضة كئيبة

خلال التلات شهور الأولى بعد ولادتها.

ده شيئ عادي وعادي تماما كمان..

اولا...

بتكون حالتها المزاجية متردية..

لا هى فرحانه ولا زعلانه..

لا هى مبسوطه ولا قرفانة...

لو لقيتها كده ماتفضلش تفكر سلوكها بأسباب خارجيه

سيبها في حالها وابعد انت بس عنها شوية..

ثانيا..

بيظهر عليها سلوك اللامبالاه وعدم الاستمتاع بأي حاجه.

يعني لو قالتلك لأ على حاجه هى بتحبها، عدي الموضوع وماتجادلش

ولو قالت نعم على حاجه هى ماكانتش طايقاها

ماتاخدش في بالك.

ثالثا.

لما تلاقي شهيتها مفتوحه قوي وفاتحة التلاجه وقاعده جواها

سيبها في حالها، ولو لقيت نفسها مقفوله عن الأكل .

برضو سيبها في حالها

رابعا..

لو لقيت مراتك نامت وانتم صاحين..

وصحيت وانتم نايمين.

سيبوها في حالها وماحدش يغلس عليها ويتفلسف ويقولها ليه

خامسا..

لو صوتت في وشك واتنرفزت عليك شويه، ياريت ماتكبرش الموضوع.

وتدخله في موضوع كرامه ،

ولو لقيتها باردة في رد فعلها معاك، .

يبقى تبعد عن وشها الساعة دي

سادسا..

لو شوفتها مش حاطالك لا ابيض ولا احمر ولا لابسالك اي نيله،

ابقى اعرف ان ده عادي في التلات شهور دول..

عاجبك الكلام ..ماشي..

مش عاجبك يبقى روح نام عند امك تلات شهور وابقى ارجع بعدها..

هتلاقيها زي الفل