"طول عمري كنت بسمعه زمان مع جدي الله يرحمه ومكنتش فاهمة كل حاجة، لما كبرت شفت كام فيديو مصدقتش نفسي من كتر التطرف، كلام فعلًا عقلي ما عرفتش أستوعبه.. حقيقي استغربت".. هكذا كلمات أسما شريف منير، عن الشيخ محمد متولي الشعراوي، ما أثار غضب الرأي العام عليها. 

وتعود القصة حينما قالت الفنانة من خلال حسابها الشخصي على "فيس بوك": "صباح الخير عايزة آخد رأيكم في حاجة، بقالي كتير معنديش ثقة في أغلب الشيوخ، كتير منهم مُدعين ويا مُتشددين أوي يا خالطين الدين بالسياسة، نفسي أسمع حد مُعتدل محترم معلوماته مش مغلوطة، لسه في حد كده؟".

واقترح عليها الكثير  الشيخ الشعراوي ولكن كانت المفاجأة أن الفنانة وصفته بالمتطرف، ما أثار غضب معجبيها ، ورد أحدهم عليها قائلاً: : "طول عمرنا بنسمع الشعراوي وشرحه للقرآن مبسط وجميل إيه بقى تطرف دي معلش !.. انتى بقالك فترة بتهبلى في كل حاجة في لبسك وطريقتك ومبقتيش تقدمى حاجات مفيده لكن تتكلمى عن الشعراوى وتقولى متطرف لا يبقي تقفي عند حدك متطرف ومش عاجب سيادتك ليه عاوزاه يحلل التاتو بتاعك؟".

الأمر الذي أجبر ابنه الفنان شريف منير الرد بالاعتذار قائلة: " حصل بينى وبين شخص حوار أسأت فيه التعبير عن اللي عايزه أقوله و حساه، اتفهم كلامى على أنى انتقد فضيلة الشيخ متولي الشعراوى، أنا بتكلم من غير ما بحسب كلامي و انا مقصدش بأى حال من الأحوال إني أغلط أو يوصل كلامي بشكل غلط كده ، انا مش بقيم فضيلة الإمام ، أنا عموما عمرى ما أحب أغلط فى حد".

وتابعت أسما قائلة: "انا بعتذر جدا جدا عشان لم استطع أن أحسن التعبير واختيار الكلمات الصحيحة وده يمكن عشان لسه بتعلم و ده عن عدم ادراك، انا لسه بتكلم علي طبيعتي زي اول يوم قررت اني اظهر على السوشيل ميديا، بس دلوقتي لازم اخد بالي من كل كلمة بقولها عشان كل حاجه بتتحسب عليا و ده جديد عليا ، و كل مافي الموضوع اني كنت بدور عن مرجع دينى و دروس دينية عشان أفهم بشكل مبسط".

وأضافت: "عشان افهمه كنت محتاجه حاجه تناسب استيعابي ، والشيخ الشعراوى أعمق من قدراتى لأني في حاجات فعلاً مفهمتهاش، وانا مبتدئة بحاول أتعلم وأقرب أكتر من ربنا، و عموما انا بعتذر فعلا عن ذلت لساني وكلمتى..وحقيقي انى اكن للشيخ الشعراوى كل احترام وتقدير رحمه الله وجزاه كل خير... و ربنا عالم نيتي ايه".

كما أشار عدد من معجبيها إلى تجاهل والدها الفنان شريف منير للأزمة وعدم رده بشكل واضح على تصريحات ابنته.