"الحمار".. حيوان نال من مجتمعاتنا العربية كثيرا من السب والتحقير والإستخاف  لدرجة أن الأغبياء في مجالات كثيرة يصفهم البعض ب " الحمير "، وفي هذا الحوار الإفتراضي كان لنا هذا اللقاء مع أحد الحمير الذي كان رافضا للحوار  لأسباب  سنذكرها في الحوار ، ولكن بعد طول معاناة قبل إجراء الحوار معه.

• أهلا وسهلا بك أيها الحمار المحترم وشكرا لقبولك للحوار.

ــ أهلا وسهلا يا سيدي العفو العفو .

• لماذا كنت رافضا إجراء هذا الحوار معك ؟

 ــ أنا كنت رافض إجراء أي حوار مع أي بني آدم ، ولكن بعد التشاور مع زملائي وإخواتي الحمير في مصر وبعض الدول العربية والأجنبية قبلت إجراء الحوار كمتحدث رسمي باسمهم ، وهم فوضوني بذلك ، لكي نكشف لكم أيها البشر معاناتنا وضيقنا وزعلنا من اللي بيحصل للحمير ، ويا ريت صوتنا وصرخاتنا توصل ، لاننا خلاص مش مستحملين إهانة اكتر من كدة.

•     طيب وأنتم إيه مطالبكم يا حمار وإيه مظاهر إهانتكم

ــ يا بيه أنت مش عايش في البلد ولا إيه ، دة اللي بيحصل فينا عيب وحرام بجد

•     طيب أشرح للبشر اللي بيحصل

ــ  يعني يرضيك يا ابن أدم الهري والهبد اللي شغال علينا على طول دة ، وعايز   أعرف بالضبط  ليه بيوصفوا الأغبياء من  البشر بالحمير ؟ مالنا احنا ومال الغباء ، أي بني أدم أو إداري أو سياسي فاشل ومبيعرفش يضبط شغله وأحيانا ميعرفش يحبك الفساد بتاعه يقولوا عليه حمار ، احنا الحمير مستغربين وبنضرب رجل على رجل  من اهانتكم الكبيرة لينا دي.

•     أنا باعتذر لك عن أي إهانة صدرت من أي بني ليكم

ــ يا سيد الإعتذار لوحده مينفعش احنا لزقت فينا التهمة دي ، وأي واحد غبي من البني أدمين  بيوصفوه بالحمار واحنا أبرياء من هذه التهمة تماما ، ما يقولوا عليه غبي بدل ما يقولوا حمار ، اللي بيحصل دة عيب.

•     طيب وبما إنك مكلف من معشر الحمير في مصر وكل بلدان العالم أنك تتحدث باسمهم وتنقل ضيقهم ، حاول تنفي عن  الحمير من أصحابك وأهلك هذه التهمة.

ــ يا استاذ إحنا كمعشر الحمير رغم كل اللي بيحصل فينا في بعض البلدان العربية ومصر من إهانة مستحملين وراضيين ، بذمتك ممكن يتقال على حمار متحمل وراضي وطالع عينه وعين اهله مع اللي بيربيه غبي ؟!! احنا بنقوم من فجرية ربنا ونفضل مع البني آدم اللي مربينا لآخر النهار ، نجر عربيات وكرتات  ونروح الغيطان ، وننقل في عز الحر  بضاعة ، وبيزودوا علينا الحمولات ويضربونا وينسوا يشربونا ويوكلونا وبيضربونا  واحنا مستحملين ومنتكلمش كلمة واحدة أو نعترض ، ومرات كتير حرامية من جنسكم سرقونا ورغم ذلك كنا أوفياء للي ربونا ورحنا البيت لوحدنا من غير محد يقولنا ، احنا اوفياء جدا للي ربونا  مع أن كثير من بني جنسكم غدارين وخونة  ولا قلب وبل ضمير ، يا باشا اللي بيعملوه بني البشر في بعضهم  لا يمكن يحصل عندنا نحن معشر الحمير ولا بيحصل في الغابات زي ما قالي الحمار المخطط صاحبي

•     انتم عددكم في مصر كام ؟

ــ احنا في مصر داخلين على المليون ونصف حمار وحمارة  ، ولا يوجد أي اهتمام بنا ، مع أن العالم خصص لنا يوم اسمه اليوم العالمي للحمير في شهر خمسة من كل عام ، وفي اليوم دة كل الدول بتهتم بالحمير وبتذكر فضلها ودورها في خدمة البشر ، ولكنكم هنا في مصر أو في العالم العربي زي ما بيقولوا إخواتنا هناك مش مهتمين باليوم دة ومكتمين عليه

•     وها نكتم عليه ليه ؟

 ــ يا ابن أدم احنا معشر الحمير المصريين والعرب ميعرفوش عننا إلا حاجة واحدة وهي الغباء وبيتهموا غيرهم بالحمير أي بالغباء مع اننا تاريخنا واضح ومشرف لكن نقول ايه في اللي غسلوا مخهم من ناحيتنا

•     تاريخكم واضح ومشرف إزاي يا حمار اكشف لجنس البشر تاريخكم المشرف دة

ــ يا سيدي في أتان  من جدودي القدامى ، والأتان دة  من صغار الحمير ، استخدمها وركبها السيد المسيح وهو داخل اورشليم ، وفي حمار من أجدادي وبخ بليعام النبي  على شره وربنا جعل جدي الحمار القديم يتكلم زي البشر ليحذره من الشر ، وإن كان القرآن الكريم وصف اصواتنا ب" أنكر " الأصوات فهو لم يصف كل شيء فينا بالمنكر ولكن اصواتنا فقط  ، إلم تعلم يا سيدي أن كل شعوب العالم تحترمنا وبل وتكرمنا لدرجة أن الحزب الديمقراطي الأمريكي نفسه وضعنا شعار له ؟ ومنظمات الرفق بالحيوان في غير البلد العربية توفر لنا كل وسائل الحماية والرعاية والترفيه والدعم وتعاقب من يهينوننا ، وفي دول عملت لينا تماثيل في الميادين  وانتم هنا شوهتم صورتنا وبهدلتونا واضطهدوتنا واحنا ساكتين ، وسكوتنا مش خوف على فكرة ولا خنوع  مع اننا ممكن نعض ونرفس ونتمرد  بل لأننا أوفياء بالفطره ومجتهدين بالغريزة ونعمل لأجلكم يا معشر البشر

•     جميل أول مرة أعرف كدة منك عن تاريخ الحمير المشرف وطيب وانتم مطالبكم ايه ؟

ــ يا استاذ بني البشر المفروض يحسوا ويقدروا باللي بنعمله معاهم من غير ما نفتح بقنا ،  وكل اللي اللي كلفوني بالحوار معك من ابناء عشيرتي من الحمير لهم عدة مطالب

•     إيه هي يا حمار ؟

ــ  المعاملة الحسنة والرعاية وبلاش ضرب وبهدلة واتهامنا بالغباء ، يا بيه دي في ناس بتتاجر باسمنا من بعض منظمات الدفاع عن حقوق الحيوان وبياخدوا فلوس على حسنا علشان يطلعوا في التليفزيون ولا في بيانات يقولوا كلمتين وخلاص ، واحنا عايزين رعاية صحية ومساكن وغطاء مناسب في عز البرد وعايزين ونفسنا ترفعوا عننا شبهة الغباء

•     ازاي نرفع عنكم شبهة وتهمة الغباء ؟

  ــ يا سيدي بلاش تقولوا على الأغبياء اللي عندكم من جنس البشر حمير أو للفاشل يا حمار ، احنا مالنا ومال الغباء ، قولوا لهم على طول يا أغبياء ولا علشان احنا مش بنتكلم بتوصفوهم بالحمير ، عيب والله ، الحمير كلها مستاءة وغضبانة ، ومش عايزين نتكلم اكتر من كدة لاننا قربنا ننفجر ، ومع ذلك راضيين لاننا لا نعرف تمرد ولا ثورات ولا لينا مطالب سوى حد أدنى من معاملة كريمة

•     طيب رسالتك يا ايه يا حمار اللي تحب توصلها لجنس البشر ؟

ــ أنا خايف اقول رسالتي يزعلوا وممكن بعد الرسالة دي يعملوا حاجات وحشة في أهلي وقرايبي من الحمير في مصر والبلاد العربية

•     قول  وما يهمكش العالم في قانون ؟

ــ قانون ايه باشا ، ولكن ها اضطر أقول  لاني مكبوت وها افرقع من الزعل من الني آمين دول ، وأول مطلب ليّ أنهم يتعلموا مننا الكفاح والنشاط والصبر والتحمل  ، وعدم مقابلة الشتائم والتجريح والإهانة بمثلهم ، ولازم يتعلموا الوفاء لإننا لاحظنا أنا وأهلي وقرايبي من الحمير نسبة الغل والحقد والكراهية والخيانة زادت بينكم يا معشر البشر ، بس ساكتين ومش بنتكلم ، لو بقيتوا زينا ها توصلوا وتكونوا زي البلاد اللي بتعامل الحمير في البلاد التانية باحترام ، احنا ثروة قومية يا باشا ومثل وقدوة للي بيفهم

•     في رسالة معينة تحب توجهها انت وحمير مصر للمصريين ؟

ــ انا قلت كل اللي نفسي فيه وكل اللي نفس معشر الحمير يقولوه لمتحدث رسمي عنهم في هذا الحوار ، ولكن نحب جميعا معشر الحمير بالإصالة عن أنفسنا وكل الحمير في مصر والبلاد العربية وبلاد المهجر أن نتوجه بالشكر والعرفان والتحية لبعض الشخصيات اللي اهتموا بينا زمان واللي عملوا علشانا جمعية باسم " جمعية الحمير المصرية " سنة 1930 " ، فنحن معشر الحمير سنظل مدانين بالوفاء والعرفان لمؤسسي هذه الجمعية

•     وانت عرفت الجمعية دي منين ومين مؤسسوها ؟

ــ يا باشا احنا معشر الحمير لا ننسى وأجدادنا كلمونا عن الجمعية دي وكيف كرمت هذه الجمعية الحمير ودافعت عن حقوقهم وكرامتهم ورفعت رؤسهم قدام  معشر البشر والحيوانات الأخرى وقتها ، وأجدادي حكوا لي وقالوا لي أن اللي اسسها فنان كبير عندكم اسمه زكي طليمات ، كل الحمير والني أدمين بتدعي له بالرحمة ، هو الفنانين والكتاب اللي اسسوها وقتها

•     شكرا جزيلا أيها الحمار المحترم على هذا الحوار وبلغ كل تحياتي للحمير

ــ العفو .. يوصل يا باشا .. انا كنت ها انفجر ..ربنا يفتح عليك طلعت كل اللي جوايا وجوة كل الحمير .. لحظة يا باشا لو سمحت دقيقة كمان  ، لان في رسالة مهمة من حيوان زميل  مش من الحمير  بلغني أمانة وكوبس إني افتكرتها علشان اقولها لك

** مين الحيوان دة وإيه هي الرسالة ؟!!

-- الخروف يا باشا ، بيقولكم يا  بشر. بلاش توصفوا  الإرهابيين بالخرفان ،لان الخرفان زعلانة جدا جدا  من الوصف دة 

* طيب متعرفش زعلانين ليه ؟

- لا ياباشا  الخروف قال لي اوصل لك الرسالة كدة وخلاص  ومعرفش تفاصيل   ولو عايز تعرف التفاصبل استفسر منه او من اي خروف

* تمام .. شكرا لك واكيد ها يكون لنا لقاء مع الخروف دة قريبا لو تتنسق لنا ميعاد معاه