يا ترى مين المدير الحقيقي.. لو دققت شوية في أي إدارة حكومية.. تطلع هيئة أو مؤسسة أو شركة أو وزارة.. أو أي شكل إداري فيه مدير ومرؤسين..هتلاقي ظاهرة... واضحة زي الشمس.. والكل بيشتكي منها ومفيش حد قادر يحلها.. إيه الظاهرة دي... تلاقي المدير في العمل لامم حواليه ... شلة مقاطيع (موظفين).

ممكن يكونوا من اللي شغالين معاه بشكل مباشر.. وممكن ينتدبهم  من أي حته.. المهم المدير بيستريح ليهم وبيثق فيهم.

وشلة المقاطيع دي ملازمين لأخينا المدير.. لو دخل الحمام..تلاقيهم واقفين له بره... شوفيتم يافندم.. محاصرينه زي ضله في كل مكان وزمان.. مابيسمحوش لأي حد يقرب منه.. إلا لما يشخلل الأول.. ابجني تجدني.

أهي شلة المقاطع دي واخدين كل المميزات .. فلوس وراحة وإجازات وتقصيرات وسفريات.. من الآخر كدة..نعيم ما بعده نعيم... مع إنك لو دورت بيعملوا مجهود إيه... علشان يشاهدوا كل المميزات دي.. هتلاقي الرقص والتنطيط والتطبيل ومسح الجوخ والمشي مع الرايجه.. من الآخر كدة شوية كدابين زفة.. لما المدير بيتكلم تلاقيهم مسامير في جزمته.. ولو مزاج المدير معتكر شوية.. تلاقيهم عملوا ارجوزات وشقلبانات زي اللي في السيرك.. المهم ثم المهم رضاه عليهم.

شلة المقاطيع دي مابتفارقش المدير.. بينقولوله كل شاردة وواردة في العمل.. عصافير وغربان.. ومن ورا المدير بيفرضوا اتاوات على أي حد عاوز يقابل المدير.. لو رضيوا على حد وزبطهم يدخلوه .. ويقولوا للمدير كلمتين حلوين في حقه.. ولو تعبانين ومش مستريحين على حد.. لأن الحد ده مش مراضيهم ومفتح دماغه معاهم.. يبقى كده عوضك على الله فيه والله يرحمه.

الموظفين المقاطع دول... بياكلوا على كل الموائد...وعندهم ألف لسان.. ومن كتر ما المدير اللي نايم على دماغه.. بيثق فيهم ثقة عمياء.. ودي بقى المصيبة.. بيبدأوا يديروا المؤسسة كلها من وراه.. لكي بيتحول الموظفين المقاطيع دول.. إلى أنهم بيكونوا المدير الفعلي للمؤسسة.. ويصبح المدير الفعلي مجرد موظف عندهم بدرجة مدير أونطة.. كل دوره إنه يسمعهم ويؤكد كلامهم وينفذ قراراتهم.. وبعد كده يقولك.. هو الإدارة بايظه ليه.. من مؤشرات علم نفس الإدارة.