القمار مش فلوس وبس.. لأ.. ممكن القمار يكون فكرة أو تصرف أو قرار ويا صابت ..أو يا خابت.. وأنت وحظك.. هكلمكم النهاردة عن نمط شخصية من البنات، ممكن تختار شاب...فيه عيوب كتير قوى.. مدمن.. عصبي.. بخيل.. ابن أمه.. ساذج.. ألخ

والغريب إن كل اللي بيحبوها وبيعزوها.. من أسرتها وأهلها ومعارفها وصاحباتها.. حذروها  كتير منه.. ويقولولها بلاش ده.. إلا هى.. دماغها زي الحيطة.. وتقولهم بكل عناد.. أنا بحبه وعاوزاه.

وعلى إيدي هغير كل الحاجات السيئة اللي فيه.. وياعيني عليها.. تاخده.. وتتجوزه.. وكلها أمل أنها هتغيره بعد ما تتجوزه.. وتمر الأيام والشهور والسنين.

ولا اتغير زي ما هى عاوزه..ولا اتهبب.. يمكن زاد سوء على سوء.. السؤال للنمط ده من البنات.. أوعى تقامري وتراني على حاجة.. من المؤكد إنك هتخسريها.. أنت بتتجوزي علشان تبقى زوجة وأم و ربة أسرة.

مش إنك أخصائية علاج نفسي وتعديل سلوك.. وتغيير انفعالات وتشوهات معرفية.. لحد أمتى هتبقى مغيبين.. مفيش حد يتغير حد.. اللي عاوز يتغير بيتغير من جواه مش من حد تاني غيره.. العريس الغفلة اللي بتقولي إنك هتغيريه لما تاخديه. ليه ماغيرش نفسه ياحببتي قبل مايتقدم ليكي.

ياريت تبطل هبل وعبط وسذاجة.. لازم مش عارفة اللي هيحصلك.. من كتر ما هو مش عاوز يتغير وبيقاومك.. أنت بقى اللي هتتغيري على أيده..عارفة هتتغيري أزاي.. هتكوني أكثر عصبية وأكثر توترا.. وأكثر معاناة نفسيا وسلوكيا وانفعاليا.

يبقى.. كان إيه لازمته كل وجع القلب ده كله.. ونفس الكلام ده كله.. ممكن ينطبق على الشاب.. إللي بيختار بنت كلها عيوب.. قال إيه هيتجوزها علشان يصلحها و يعدلها.. أنت زوج يا حبيبي مش سمكري وميكانيكي.. فوقوا كده وصحصحوا.