عندما يكون الخلاف بين الزوج والزوجة السبيل إلى إفساد شخصية الأبناء والبنات، فإن تربية الأبناء ليست بالأمر اليسير، فهي مهمة شاقة جدا وصعبة للغاية..

وهعرض لكم النهاردة.. إزاي اختلافك مع جوزك.. وخلافات جوزك معاك.. ممكن يكون سبب رئيسي في اضطراب أولادكم وبناتكم.. النفسي والانفعالي والسلوكي... والأبناء للأسف هم من يدفعوا في الآخر ثمن فاتورة فشلكم أنتم الاتنين كزوجين.. وبيشيلوا الليلة كلها طول العمر.. سواء في وجودكم أو بعد رحيلكم عن حياتهم لما يكبروا.

هكلمكم عن حاجة اسمها التثليث.. ودي معناها.. إن لما الزوجة ماتبقاش قادرة ترد على جوزها.. ومش قادرة تنفس غضبها على جوزها اللي مضايقها ..  ومش قادرة تحل مشاكلها معاه.. تقوم تدور على أحب ولد أو بنت يكون قريب من أبوهم.. وتقوم  تفش فيه كل غلها وغضبها وعقابها... قال إيه.. عاوزة تحرق دم جوزها في عقاب أحب أولاده إليه.. ويمكن ميكونش الولد أو البنت عملوا حاجة غلط .. تستوجب منها عقباهم الشديد عليهم.

وممكن كمان تستقطبهم معاها ضد أبوهم.. وتعملهم كل حاجه الأب رافضها علشان تستقوى بيهم .. وتعمل منهم جبهة مضادة نحو الأب.. ونفس اللي عملته الأم ممكن الأب يعمله بالضبط.. أنتم عارفين الأسلوب الفاشل ده ممكن يعمل إيه.. الأولاد اللي بيستقطبهم الأب لصفه.. ممكن يكرهوا إخواتهم اللي بتستقطبهم الأم لصفها.. وده أول شقاق وتفكك بين الإخوة...هيبان لما يكبروا..

الأولاد من صغرهم بيتعلموا المكائد والمؤامرات.. والأسلوب ده من الزوجين أكبر دليل على عدم نضحهم النفسي والانغعالي.. وبدل ما يحلوا خلافاتهم بينهم...بيصدروها لعيالهم.. ياريت نفهم... ونبعد بمشاكلنا عن ولادنا.