أول مرة بكون حقيقي مش عارفة

أهو عايشة بس حقيقي مش عايشة

أهو بتنفس بس حقيقي مكتوم على نفسي

أهو قلبي كان ضعيف بس خلاص استقوى وشد حيله

مش عايزة أتجمل مش عايزة أكون حد غيري، مش عايزة أكون تايهة ومش عارفة طريقي

قلبي حديد و لا فولاذ و لا إيه بالظبط مش عارفة

الحياة وحدها لغز ياما بنشوف ناس فيها وما بنتعلمش برضو

كل مرة بنكتشف ألغاز وكل مرة بنتخبط ونتخض، خضة جامدة بس برضو  لحد دلوقتي مش فاهمين.

أهو عايشين وبنداري وراء ابتسامة بس قلبنا من جوه مخبي ياما  شايل كتير، شايل هم كل حاجة، خايف من بكرة و إللي بعده 

خايف لا يصحى ومش عارفه طريقه فين

ياه هي مواجهة الأيام صعبة كدة؟

أكتر شيء بيوجعنا هو الزمن علشان بيمر بسرعة

أنا كنت فاكره من يومين كنت صغيرة جدا بس خلاص دلوقتي راحت كل أيام الطفولة و بقينا كبار وشايلين كل حاجة  بنصارع مع الأيام.

بنصارع بين قلبنا وعقلنا بنصارع ما بين السعادة والوجع

بس مش دايما بنقدر نختار بس بنحاول على قد ما نقدر نختار و نفهم كويس دروس الحياة مهما كانت مؤلمة

كل حاجة في الدنيا فيها حكمة بنكتشفها مع مرور الزمن

أهو بحاول أكون متفائلة على قد ما أقدر علشان الوقت ما بيستناش هو إحنا بنقدر نوقف عقارب الساعة يا ريت بس ما بنقدرش علشان كدة الوقت ما بيرحمش.

الدنيا بتلف و بدور بس إحنا قادرين نغير كل حاجة بإيماننا بربنا مهما كان الوجع ربنا قادر يبعتلنا كتير هدايا من السماء كتير مفاجآت تعوض على كل السنين إللى فاتت بس ربنا بيحبنا نكون أقوياء ده إللي دايما بقوله و بصبر به نفسي المستعجلة.