كان تايه بين أوراقه مش لاقي لقلمه مكان

خايف تظهر أفراحه لتتوه وسط الأحزان

كان عايش جوه خياله بيحسس نفسه الأمان

كان دايب في أحباءه مـ الآهه ومـ الحرمان

كان شايل جوه ضميره حبة طيبة و نسيان

كان شايف جوه كلامه انه مش انسان .. من كتر آلامه قام صارخ بالأوجاع .. زلزال بيهز كيانه ومزاد علشان يتباع

من أول واحد كان بينهم أيام وسنين .. ولغايه اقرب صاحب كان ساكن ضي العين

وحبيب بيفض مشاعره وبيلغي العهد معاه

ويقوم ويفارق قلبه ويسيب ذكراه جواه

جدران البيت ضماه بتهون ياما عليه

ومخدته جات حاضناه ولا حدش خد بايديه

لامم حبات الماضي وشايلها ما بين أوراقه

ماتعلمش وكان راضي يغضل مهزوم بغبائه

من طيبة قلبه استسلم للدنيا وللمكتوب .. يمكن عايش يتبسم لكن جواه مغلوب

ولأنه فـ عز الليل بيميل لهدوء الروح .. لو كان في القلب عليل بيغيب عنه وبيروح

كان تايه بين أوراقه لملم من عمره كلام

وتجارب كان بيعيشها عدت قصص الأفلام

كان نفسه يحن لروحه ويخاف على احساس قلبه .. كان أعمى القلب ساعتها مالقاش ولا واحد جنبه

شخبط على كل جراحه راح شغل مزيكا .. وعشان الناس يرتاحو داس على نفسه بأسيتكه