رسالتنا لموقع " خط أحمر " بإختصار خاصة بشخص منعرفوش ولا نعرف عنه حاجة غير أسمه وسمعته الطيبة وهو الأستاذ محمد علي ، شاب مثقف ومحترم ، إتعيين رئيس شهر عقاري " الدخيلة " بمحافظة الأسكندرية ، من فترة ، كان بيقف ينظم الناس بنفسه ويديهم ارقام ، وتلاقيه دايما واقف علي رجله بيختم للناس بالدور ،ومش قاعد في مكتبه عشان يقدر ينظم الناس ،

كان حابس نفس السماسرة والزحمة كان بيقضي عليها ديما بأنه ينظم الناس ، وكان بيشتكي كتير من قلة الموظفين ومن بهدلة الناس في الزحمة وكان بيأمل أنه يطور في المكان ، بالإضافة إلي أنه طرد فاسدين كتير من الشهر العقاري بس طلب زيادة الموظفين وواجه السماسرة ، ولكن الضغط عليه كان كبير وعدد الموظفين قليل ،وكانت نتيجة طلبه انه تم نقله إلي مكتب شهر عقاري " برج العرب " وده للأسف نتيجة مراعاة ضميره وللأسف ده كمان مش هيخلي ، بعد كدة حد يفكر يطور مكانه ولا ينظمه ولا يقضي علي الفساد اللي فيه لانه هيبقي عبرة.

وهذه الصورة ، للشهر العقاري بعد ممشي الموظف المحترم " محمد علي بكام يوم ، الناس واقفه فوق بعضها والسماسرة بتتحكم والموظفين حتي الساعه ٩ لا يوجد ولا موظف .

ملحوظة:احنا مانعرفش الموظف ده شخصيا لكن بحثنا عنه وجدنا كمية ناس بتحبه وتحترمه كتير جدا لانه موظف بيشوف شغله بما يرضي الله وباحترام وهو ده اللي دفعنا اننا نقف جنبه وجنب اي موظف مظلوم محترم فياريت الكل يساعدنا نوصل صرخته اللي مصرخهاش للمسؤلين علشان حقه يرج له .

أهالي الدخيلة