عاوزها كده...

يبقى إنت كمان تبقى كده...

في بعض الرجال والشباب ..

معندهومش أي إهتمام لا بمظهرهم...

ولا بنظافتهم الشخصية ...

ولا بأناقتهم ولا بلبسهم. ...

ولا بهيئتهم..

لا بره البيت ولا جوه البيت.

والغريب أن الصنف ده من الرجال...

تلاقيه ليل ونهار نازل تنكيت وتبكيت..

في البنت خطيبته او الست مراته الغلبانه..

ليه مابتلبسيش زي الستات..

ايه ذنبي اشوفك كده....

ليه مابتتزينيش زي الستات...

ليه مابتحطيش شوية الأبيض والأحمر.

ليه مابتتدلعيش زي الستات...

انت ليه جسمك تخين ومكعور.

شكلك بقى عامل كده ايه ...

تعالوا بقى نشوف أخينا الحيله ده...

اللي نازل نأوره وتريقه....

على الوليه مراته الغلبانة.

تلاقيه قاعد في البيت

(بوروطه)
مش هاين عليه حتى يقوم.يسرح شعره..

مش هنقول هيغسله بالميه.هههههههه

ومخاصم إختراع اسمه المشط...

وتحس أن شعره المنكوش...

عامل ذي عش العصفورة الأرملة..

اللي جوزها العصفور مات وسابها متشحتفه.

ناقص يحط في شعره بيضتين..

وكتكوتين ويفقس....

لابس بنطلون بيجامه (أقلام أقلام) أكبر من مقاسه

وشكله كده يدي على فطوطة وممكن بطوطه

لابس تي شيرت ...

متكسر ومدشدش ومش مكوي.

كأنك بتتفرج على بلياتشو في سيرك...

والغريب انه بيمشي في الشقة نافش ريشة

كأنه الممثل العالمي توم كروز ولا ستيفن سيجال.

وهو في الحقيقة بكتيره فتحي العسال.

حاطط في رجليه شبشب بصباع فرده لون وفرده شكل تاني..

وممكن تكون فرده من شبشبه وفرده من شبشب مراته

هو لسه هيتعب وهيدور على الفرده التانية..هههه

بقالة ساعة صاحي من النوم مغسلش وشه.

وشكله عامل زي الممثلين اللي بيمثلوا أدوار كفار مكه في الأفلام الأبيض والأسود.

إلا تستحم يارجل.ههههههههه

بينه وبين البرفانات خصام...

وبينه وبين مزيلات العرق بعاد.

تقريبا مايعرفش أن في اختراع اسمه مرايه.

ضوافره طويله و و......

ويدخل من بره بيته على الأكل على طول. .

حتى مابيغسلش ايده ...

وياسلام لما يحب يقيل (ينام شوية) في الضهرية

تلاقيه طلع على السرير بالشراب. ..

اللي مقلعهوش بقالة 12 ساعة....

نوشادر أصلي

لدرجة انك ممكن تشم ريحة رجليه. .

من على بعد كيلو

و أي حد يغمى عليه في الحته شمموه بس الشراب

وبعد كل ده..

تلاقيه بسلامته.يرفع حاجب وينزل حاجب...

ويتنئور على الست بتاعته.

ويقولك..

وهو بيتمطع وممكن يطق له عرق.

أنا مشكلتي مع مراتي. ..

إنها مش واخده بالها من نفسها.

روح جتك ستين وكسه ونيله..

انت مش شايف نفسك ولا ايه.

قال عاوزها جاهزه.. قال....

بأمارة أيه يا حيله مش لما تكون أنت كمان جاهز.

انصحك بمناسبة قرب العيد الكبير.

تقوم تستحمى حمية العيد

بتاعة كل سنة.

مجرد خاطره