فتح الإعلامي محمد موسى، النار على الفنان محمد رمضان، بسبب تعمده إثارة التريند دائما واستفزاز الجماهير بتصريحات غاضبة والتى كانت آخرها إعلانه إدراج اسمه كأول فنان مصري يُذكر في الكتاب الذهبي، عن الأكثر تأثيرا وجماهيرية في القارة الإفريقية".

وقال محمد موسى خلال تقديم برنامج "خط أحمر" على قناة الحدث اليوم، أنا معرفش أيه حكاية الكتاب الذهبي ده ومين اللي قائم عليه ومش فاهم كمان اختيار الأخ رمضان كالأكثر تأثيرا في أفريقيا بناءً علي إيه ؟ هل بناءً علي أعماله الفنية اللي رسخت مفاهيم البلطجة وتجارة الممنوعات والمخدرات ولا الأشياء اللي بيقول عنها أغاني وكلها بيتكلم فيها عن نفسه ولا إيه الحكاية".

تابع محمد موسى، بصراحة عايز أعرف سر محمد رمضان مع مشتقات الدهب مرة يكلمنا عن التليفون الأيفون الدهب ومرة عن الكف الدهب ومؤخرا عن الصابونة الدهب اللي هيغسل بها وشه وهيكون لها استخدامات تانية هو بس اللي عارفها وبتكون برضه في الحمام وأخر افتكاسه موضوع الكتاب الدهب ...ياعم الحاج تعبتنا هو الفراغ متملك منك للدرجة دي ولا أنت مبقيتش تفكر غير في إنك تبقي موجود وخلاص حتي لو علي حساب استفزاز الناس.

واستكمل: "بعدين عايز اعرف دار النشر اللي طبعت كتاب الفنكوش ده اسمها إيه .. هو أي حد يعمل أي حاجة وخلاص.. ياعم كفاية بقا حرام عليك نفسك أنت بتنتحر جماهيريا".