عندنا في مصر مثل شعبي..

عيب إني أقوله..لأن ريحته وحشة..

أهل البلد عارفينه كويس قوووووي..

(لو كانت  الأسماء بتنشري..كان سموه خ..ابن خ...)

وعلشان الألقاب العلمية والمهنية عندنا في مصر.. ملهاش لاتمن ولا قيمة..

بقى كل من هب ودب ممكن يحط قبل اسمه أي لقب.

هو شايفه وعاوزه  دون أي وجه حق..

وده في بلاد الفرنج بيعتبروه  تدليس وغش وخداع...

أما عندنا بيسموه  فهلوة وشطارة واسترزاق....

وطبعا الألقاب دي مش للوجاهه بس..

لأ..

ده الباب الخلفي للضحك على الناس واستغلالهم والنصب عليهم

ياترى مين المسؤول في مصر عن حساب وعقاب..

هؤلاء المتنطعين بالألقاب التي لا يستحقونها ..

أعرف واحده.. كانت من أفشل الطلاب عندي...

وإذ فجأة ألاقيها مالية الدنيا بالصوت والصورة...

في كافة البرامج الإذاعية و التلفزيونية ووسائل الاتصال المدفوعة الأجر.

وقد سبق اسمها سلسلة من الألقاب..المعالجة، المستشارة الخبيرة..معدلة السلوك.. أخصائية التخاطب.. إلخ

ناقص كمان تكتب لو بتركب جلدة للحنفيات البايظة..

كل لقب منها  يهد جبل..

والناس  معذوره وبتتهافت عليها وفقا لهذه الألقاب..

ولما نفتح المسكوت عليه.. يقولك ده أكل عيش..

كأننا قاعدين في ورشة سباكة وبنتخانق على مرمه...

ياجماعة الموضوع كبير ومش مجرد أكل عيش..

واسترزاق وخفة يد وشطارة....

الموضوع بقى تدليس على الناس يعني نصب واحتيال

لو في تفعيل للقانون يوقع صاحبه تحت طائلة القانون

ليه الجهات الرسمية مابتتحركش..

مش عارف ولا فاهم ولا مدرك.

والغريب إن الأشخاص دي إللي عاملين زي الطفيليات.

بيظهروا في كل لحظه أمام وسائل الإعلام...

بالصوت والصورة والتايتل إللي وأخد نص الشاشة..

بمنتهى الجرأة والتحدي وعيني عينك ووش وش بالألقاب المزيفة دي.

يعني الموضوع ما بقاش حد بيضحك على الناس واستغلالهم في الخفاء بس.

لأ..

ده  بقى في ناس شغالين في الإعلام بيسترزقوا كمان من ترويج الناس دي

وتسهيل دخولهم عبر تلك الجهات الإعلامية ذائعة الصيت جماهيريًا

مما يجعل المصيبة مصيبتن..

ولا إيه رائيكم في معيد يعني لسة طالب بيدرس.

بيتكتب تحت اسمه في التليفزيون أستاذ دكتور..

خدوا من الألقاب دي كتير...

تلاقي واحد بيدي نفسه لقب دكتور وهو مش محصل حتى تور

ورزق الهبل على المجانين..

وواحد تاني مسمي نفسه خبير وهو يدوبك ..

ممكن يكون عود جرجير أو سواق حمير..

والتالت..بيقول على نفسه مستشار..

وهو مش محصل حتى  شوية فشار...(بكسر الفاء)

والرابع يقولك.. ناشت(ناشط) سياسي...

وهو تلاقيه ساقط إعدادية قديمة...

هو في إيه ياجماعة للدرجة دي وصل بينا التخلف

والسؤال...

هو مين ياترى اللي مخه تعبان وحاسس بالنقص وكله عقد نفسية.

الشخص اللي حاطط قدام اسمه لقب مش لقبه.

على اعتبار عنده نقاط ضعف وبيحاول يعوضها..

والشخص اللي بيصدقه وبالتالي اعتباره أهبل وساذج..

والأرزقية بتوع الترويح الإعلامي إللي بيسمحولهم بالظهور والتلميع

في الحقيقة ..

الكل عاوز يتحط  في التخشيبة والعرض على النيابة..

مع مراعاة التجديد في الميعاد...

اختشوا يا شوية أفاقين..

علشان كده..أنا قررت من فترة..

لما ألاقي حد من الكائنات الطفيلية المدعية للألقاب دي.

في جلسة خاصة أو ندوة أو مؤتمر أو ورشة عمل..

بقيت أديلة على قفاه وأكسفه وأحرجه قدام كل الناس..

بالطريقة دي ..لو كل واحد عمل كدة..بعد فترة

الكائنات المتسلقة دي..هتبدأ تختفي وتندثر وتنقرض.

#اكشفوهم..#واكسفوهم#ماتتكسفوش..

روحوا كاتكم الأرف مليتوا البلد...