رد الفنان سليمان عيد على الهجوم الذى تعرض له من جمهور الأهلى بعد احتفاله بفوز الزمالك ببطولة الدورى، معربًا عن حزنه الشديد لما تعرض له من إساءة.

وقال سليمان عيد في مداخلة هاتفية بإحدى البرامج التليفزيونية: من ساعة الصورة ما نزلت وفى إهانة كبيره أتعرض لها، رغم إنى هنيت الزمالك فى الموسم الماضى ببطولة الدورى، وكنت أهنأ الاهلى عندما يفوز.

وتابع :" 40 سنة تمثيل عملت فيهم أدوار كتير، عمري ما اتعرضت لكده، وبمجرد ما نزلت الصورة اللي فرحان فيها بفوز الزمالك لقيت كمية شتيمة متعرضتش ليها في حياتي كلها :"

وأضاف :" عايز أعرف يعنى إيه بواب، البواب دى مهنة شريفة، وما يحدث إهانة للمهنة المحترمة "البواب" وليس لسليمان عيد.

وأردف: أنا نفسي الناس تبقى حبايب مع بعض دي لعبة، أنا ولادي أهلاوية كلهم وبنقعد نهزر مع بعض.. يعني إيه بواب؟ الإيفيه دمه تقيل، هو أي حد هياخد الدوري غير الأهلي هيتهان؟ وليه الزمالك دايما في مشاكل مبتخلصش، ولما الأهلي بيخسر الإعلام والدنيا بتقوم.

واستطرد: لازم يطلع قانون أو حاجة في موضوع الإساءة ده لأنه فعلًا مضايقني جدًا، وأنا بحب كل لاعيبة الأهلي والزمالك، أنا اتصدمت من الردود وبحاول أعرف مصدرها، لو معندناش أخلاق يبقى منتكلمش مع بعض.