في فترة معينة كده قبل نزول الدورة الشهرية لمراتك ،بتبقى فيها مراتك مش طبيعية شوية ياريت تراعي نفسيتها وحالتها الانفعالية ، في الوقت ده يعني من الاخر كده خليك معاها حنين ، هى مش ناقصه.

أنا هقولك شوية اعراض بتنتاب مراتك قبل الدورة ماتيجيلها باسبوع تقريبا ، والاعراض دي بيسموها في التخصص الطبي بأسم متلازمة التوتر السابق على الدورة الشهرية

Premenstrual SYndrom

مش هكلمك على الاعراض الجسميه، لأنها كتيره ، لكن يهمني دلوقتي أقولك على الاعراض النفسية و الانفعالية والعصبية ، مراتك في الوقت ده بتبقى متوتره وقلقانه ، فياريت حضرتك ماتزودش قلقها أو تتعامل معاها بطريقة تزود القلق.. كفايه إللي فيها ، مراتك في الوقت ده بتبقى عصبيه شوية ، يعنى لو انفعلت بزياده شويه عليك ، عاوزك تكبر دماغك وتعديها وماتركزش ، مراتك في الوقت ده بتبقى مكتئبة حبتين ، مش اي حاجه تفرحها وتسعده.

ماتقعدش تقول إنت نكديه ووشك مقلوب ليه .. لأنها حالتها في الظروف العادية مابتكونش كده ، مراتك بتكون في الوقت ده حساسة زياده عن اللزوم ، مش عاوزك تشد عليها وتجرحها بأي كلمه،هى كده كده بتبقى حساسه قوي ، وأي كلمة أو سلوك منك مش حلو ممكن يغير مودها إللي هو متغير أصلا ، مراتك في الوقت ده بيكون تركيزها تعبان شويه ، ما تفضلش تقول إنت مش مركزه ليه وإنت سرحانه ليه.

مراتك في الوقت ده بتكون على طول حاسه بالتعب ، يعني أقل مجهود ممكن يتعبها ، ما تفضلش تتريق وتسخر منها ، إنها مش قادرة تتحرك ، كمان لازم تعرف إن دافعيتها ورغبتها ، في أداء الأعمال التقليدية ليها في البيت بتقل شوية ، مراتك في الوقت ده بتبقى حاسه على طول بأنها جعانه ، فماتبخلش عليها.. فك كيسك وهاتلها إللي نفسها تاكله .

عندك أبو مازن وانس الدمشقي وكل أنواع الكريبات ، وياسلام بقى لو نفسها جريت على السي فود ، يبقى أمك داعيه عليك ، دي بعض الارشاد آت للازواج .. الله يكون في عونهم ويصبرهم ويقويهم..عرفتم الراجل بيتعب قد إيه... نهاركم زي وشوشكم...