مثل شعبى أو مقولة مصرية تقال عندما يأتي أحد في وقت وضع الطعام ، أو عند زيارة أحد في وقت قرب إنتهاء طبخة لذيذة فيقول المستضيف للزائر ( حماتك بتحبك) ، وهنا بعض الأسئلة

1-ما علاقة الأكل بالحماة ؟

2-إشمعنى حماتى مش حد تانى؟

3- كيف تجعل حماتك تحبك ؟

إستكمالاً للغز سأجيبك على الأسئلة بالعكس :ـ

كيف تجعل حماتك تحبك ؟

إجابتى تصلح للزوجين

أولاً لازم تعرف إن حماتك لو حبتك حياتك هتبقى جنة و ستتجنب مشاكل كثيرة ، وافهم كمان إن فهمك لحماتك هيساعدك كتير فى فهم مراتك أو فهم جوزك هذه حقيقة ، ولذلك هساعدك بـ 10 أشياء تعملها وساعتها حماتك هتحبك جداً جداً

1-أشكر فيها دايمًا أمامها ، ولا تنتظر إعجابها بكلامك وشكرك فيها.

2-لما تاكل أكلها لازم تقولها إن أكلها رائع يعني (أحلى شيف) .

3-كل فترة هاتلها هديه ولو بسيطة إوعى تنسى لها تأثير عجيب .

4- جبلها رفايع تنفعها من غير مناسبة .

5- لما تروح تصيف خد والدتك معاك مرة وخدها هي كمان معاك مرة بس أنا بحذرك إياك تاخد الاتنين مع بعض في مصيف واحد .

6- مفيش حاجة إسمها سلام حاف لااازم تبوس .

7- لو خلفت بنت شاركها فى إختيار الإسم ، وياسلام لو سميت بنتك على إسمها لو أسمها مش هيعقد بنتك فيما بعد .

8- لما تقعد معاها هزر معاها كتير بس ماتحفلش عليها يعني خلي هزارك في الحد المسموح .

9- فكرها بشبابها وإنك معجب بصورها القديمة وإنها كانت جميلة....صدقنى هتفرح وهتدعيلى .

10- إوعى تقولها يا حماتى أو نينا هتحطك فى دماغها قولها ماما (كذا) أو بإسم الدلع بتاعها ،أو يا قمر يا جميل

نسبة نجاح هذه النصائح فائقة جدآ جدآ

نخش بقى فى إجابة السؤال الثانى

إشمعنى حماتى بالذات؟

لازم تفهموا إن الإبنه أو الإبن أصلاً كان ملكاً خاصاً لأهله مدة طويلة وعلشان يتاخد منهم لازم تأخذه بإحتراف لتنتقل الملكية لك كاملة وإلا سيظلوا شركاء لك فيه وقد تكون نسبتهم فى الشراكة أكبر منك ويطمعوا فى السيطرة على الشركة وتبقى وقعتك بلاك.

وعلشان الأم هى أكتر حد بيتعب فى تربية الأولاد بيكون (تأثيرها كبير عليهم) ، وتأثيرها كبير على كل من له علاقة بهم وسحب الملكية منها كاملة صعب جداً وبياخد وقت .

عرفت إشمعنى هي ....

إجابة السؤال الأول وهو محور المقال ... ما علاقة الأكل بالحماة الخلاصة هى:

حماتك من حظك ، لو بتحبك يبقى حظك حلو .

ربطوا الأكل بالحظ بمعني لما تروح زيارة لحد ويكون عامل أكله حلوة بيقولوا حظك حلو حماتك بتحبك فتخيل وتخيلي كده لما أمه تحبك وتدعيلك كمان يبقى حظك حلو وحماتك تحبك .