* الناس اللى زعلانه على المستوى اللى وصلت له الدراما المصريه بعد ما كانت صاحبه شنه ورنه فى الوطن العربى بالكامل وقدرت انها تغزو الخريطه من المحيط الى الخليج باللغه المصريه والافكار والعادات وحتى طريقه الضحك وخفه دم المصريين كانت هى الاشهر فى الوطن العربى بالكامل . اكيد لهم حق يزعلوا على كل اللى فات خاصه وانهم عارفين ان فى عدد كبير من اساتذه وصناع هذا المجال اصبحوا بعيد عن الملعب رغم تفوقهم وتاريخهم الكبير واعمالهم اللى لسه بنفتكرها ونترحم عليها.. ومؤكد ان لو القائمين على الدراما يهمهم يصالحوا الناس اللى زعلانه يبقى اول قرار يكون رجوع الكبار للملعب حتى ولو بالاشراف على الاعمال المقدمه خاصه وان معظم الاعمال الدراميه اصبحت نتاج ورش مشتركه للكتابه ولا ضرر من الاستعانه بالمؤلفين القدامى خاصه و أنهم اصحاب خبره وقامه فى الاعمال الدراميه وافتح القوس واكتب فين محمد جلال عبد القوى ويسرى الجندى وبشير الديك ومصطفى محرم .. الخ الكتاب الكبار ياريت نستعين بخبراتهم وفكرهم كونهم اعمده مهمه على مر التاريخ فى ملعب الدراما التليفزيونيه ونحاول نستفيد منهم وهم احياء يرزقون

* الناس اللى زعلانه ان الفنان محمد رمضان قلع هدومه وظهر عارى فى حفلته الغنائيه الماضيه والموضوع كبر معاهم من الزعل ..عايز اقولهم هاتلى عمل للفنان محمد رمضان مقلعش فيه هدومه عشان يظهر البنش والتراى سيبس والمجانص والترابيس اللى شقى وعاش جوه الجيم عشان يكبرهم واللى اصبحوا جزء اصيل فى تركيبته وتكوينه.. عشان كده انصحك بعدم الزعل عشان ضغطك ميعلاش وحاول تتقبل الامر لانها لا اول مره ولا هتبقى الاخيره .. الفنان محمد رمضان اصبح اسلوب حياه وقدوه لشباب كتير بغض النظر اختلفنا او اتفقنا على موهبته ونوعيه فنه .. الافضل نتعامل مع الموضوع بحكمه بعيدا عن الزعل ونحاول الاستفاده من شعبيه وموهبه محمد رمضان زى ما حصل قبل كده فى حملات لا للمخدرات والتوعيه وده دور الدوله فى الاستفاده من نجوميه رمضان لتوجيهه الشباب لطرق افضل زى ما عمل رمضان فى اخر كليباته القمر واللى كان بيحسهم فيه على السعى ورا الحلم وعدم الاحباط وبالفعل سواء اتفقنا او اختلفنا عليه لكنه يبقى رمضان مشروع ناجح بفضل ذكاؤه وسعيه الدؤوب خلف موهبته ويتبقى لنا ان نستثمر كدوله هذا النجاح بطرق سليمه ايجابيه تحقق نتائج ايجابيه

* الناس اللى زعلانه ان مسلسل ابو العروسه احداثه انتهت وكان نفسهم تمتد لشهور او سنين .. عايز اقولك عندك حق لان لعبه الدراما التليفزيونيه طول عمرها قائمه على الحدودته والاحداث والعلاقات المتشابكه والشخصيات الدراميه المرسومه كويس .. الدراما الاجتماعيه اللى بينتمى لها مسلسل ابو العروسه طول عمرها بتجمع المشاهدين حول شاشه التليفزيون وده جمال وسر عبقريه ونجاح الدراما الاجتماعيه اللى اغلبيه مشاهدينها امى وامك واخواتى واخواتك اللى اتعودوا يتابعوا الحدودته الدراميه البسيطه فى الحكى والمحكمه الحبكه فى التركيب .. عشان كده بضم صوتى لاصوات الناس دى وبطالب القائمين واصحاب القرار الاهتمام بشريحه المشاهدين دول لانها كبيره جدا وكفايه مسلسلات عضلات وخبط ورزع وممثلين كلهم اصبحوا شكل واحد بسبب موضه الشنب والدقن اللى اصبحت جزء لا يتجزء من ادوات الممثل واللى العين زهقت منها بقى ... كفايه شنب ودفن بقى

* الناس اللى زعلانه من كم الاعلانات اللى جوه الدراما التليفزيونيه عندهم حق والله لانك اصبحت تتابع وتشاهد اعلانات يتخللها بعض من الدراما والمشاهد القليله .. طبعا من حق القنوات المعلنه انهم يكسبوا ويجمعوا الفلوس اللى دفعوها لشركه الانتاج عشان يعرضوا المسلسل بس ارجع واقول الرحمه حلوه خلوها النص بالنص او التلت والتلتين او خلوها بأى نسبه معقوله تخلى المشاهد لا يفقد متعه المشاهده ويعرف يتابع الاحداث لان اللى بيحصل انك تبقى قاعد قدان الاعلانات وناسى المحطه اصلا كانت بتعرض ايه .... الرحمه حلوه وخلوا الناس دى تستمتع وبلاش تخنقوهم