إزاي تكسب قلب مراتك بالطريقة المصرية ، مش هقولك طبعا خشلها ومعاك بوكيه ورد.. لأ. لأ.. لأ .. ولا هقولك سمعها وإنت بتتعشا معاها مونا مور K ولا إنك تعزمها على شو بحيرة البجعة في الاوبرا.... لأ .. ولا إنك تعزمها على رحلة بحريه تطوفوا فيها شواطئ دول البحر المتوسط من غير ما تنزلوا من السفينه لمدة اسبوعين.. ..لأ.. لأ .. ولا إنك تعزمها على رقصه سلو أو حتى فاست ، في سهرة ليليه في أحد الملاهي البريئة .. لأ .. هتقولي لما كل ده ومش رومانسي من وجهة نظرها ، اومال هبقى رومانسي ومحبوب عندها إزاي..

أقولك..

كل ما تدخل عليها البيت تبقى شايل خضار ولحمه وفاكهة ، وكل ما تقعد في البيت يبقى تشيل الواد والبنت وتغيرلهم البامبرز وتسكتهم من الزن ، وياسلام وإنت بتغيرلهم البامبرز يبقى معاك مناديل مبلله لزوم تنشيفهم .

وياريت تاخدهم وتتكشح لمده ساعتين كده بره البيت وكل ما تلاقيها في المطبخ تقوم من سكات ودون زن منها ، لابس المريله وواخد كل المواعين وتغسلهم ، بس بأمانه وتحط الفيري صح وتنشف صح وترصص صح.

وياسلام لو كمان سحبت المكنسه ، واخدت الشقه كلها وش ترويق وبعدها ترتيب وبعدين تلميع وكل ماتحس إن مصاريف الشهر معاها خستعت ، قوم واجري و تحط في ايديها جزء من الاحتياطي النقدي .

وكل ما تلاقيها رايحه السوبرماركت تشتري حاجات البيت ،تروح رايح معاها تشيل العيال وتشيل الأكياس وتحاسب الكاشير وتطلع معاها الحاجه لحد الشقة لما توصلوا ، وترتب معاها كمان الحاجات إللي جبتوها وتخزنها في اماكنها .

وكل ما تلاقي باب شقتك خبط وبصيت في العين السريه ، وشوفت إللي يضرب على عينه بتاع الغاز أو الكهربا أو البواب أو بتاع الزباله ، تقوم من سكات وبجنتله دافع وكاعع ، من غير ما تقولها دفعت كام أو تطلب منها فلوس ، كل ما تروحوا أي زيارة في أي حته تقوم لامم الولاد حواليك ومسيطر عليهم وبنظرة منك مايتحركوش ويبقوا قاعدين زي الألف .

لما تكون قاعد يوم اجازتك في البيت تقوم ترتب الاوضه وتلبس في رجلك شبشب ولما تاكل ماتوقعش أي حاجه على الارض وبالليل قبل ماتتخمد تطلع الزباله بره وتطفي نور السلم..

بصوا ياجماعه.. الارشادآت لسه طويله وكتيره بس أنا النهارده هكتفي بإللي كتبته وربنا يقدرنا على فعل الخير إللي لو عملتها أيها الزوج الهمام هتكون فارس فارس أحلام الست بتاعتك.

ومش بعيد الست مراتك تعزفلك على الربابه والكمانجه قدام صاحباتها المقاطيع أحلى وأجمل موسيقي تصويرية لحضرتك كحبيب وفارس احلامها ، اقصد تيتانك للرائعة سلين ديون...