مبدئيا كدا أول مابسمع جملة ’ أنا الراجل ‘فى أى نقاش بيجمعنى بأى شخص من مدعى هذه ’الصفه‘ بتأكد علطول إنى هاكسب النقاش وان الشخص اللى قدامى ده عاوز ينهى الحوار ’و بيجيب ورا ‘ فابيستخبي ورا الوضع اللى اتخلق عليه ,ودى بتبقي أسهل الطرق للهروب وفرض وجهة نظره.

فى البدايه كدا عاوز أبلغ سيادتك ان الصفه دى مكتسبه يعنى بتتعب وبتشقى لغاية ماتبنيها وتكبرها وتشوفها صرح كبير كدا بيكبر يوم بعد يوم قدام عنيك ،مابتتخلقش بيها زى ماانت واهم نفسك ،يعنى مش كل الذكور رجال زى ماانت فاهم.

الاسطى مرسي دايما يقول جملة أنا الراجل للست فوزية مراته علشان ينهى أى حوار بينهم لما بيتأكد ان وجهة نظرها صح تحس كدا ياجدع انه خايف يحسسها انها بتعرف تفكر مرض بقي والعياذ بالله ،والبشمهندس أشرف جملة أنا الراجل لبانة في بقه بيقولها عمال على بطال للدكتورة نسمة خطيبتة ،وهى ياعين أمها مش عارفه تاخد معاه حق ولابطال لأن رجولته دايما بتهددها بفسخ الخطوبة، الأستاذ حنفي ده اللى مضحك حبتين دايما يقول أنا الراجل للأستاذه عواطف زميلتة في الشغل ورأى هو اللى هايمشى وياريت بيقولها على حاجه عدله ،ده بيبقي انهاء حوار هانفطر ايه النهارده طعمية ولا بتنجان ؟، ودايما سمير بيقولها لأختة سمر وعماد بيقولها لأمه الست زينب وكأن جملة أنا الراجل دى بيستخدموها كدفاع شرعى عن النفس .

انت الراجل ياسيدى , واحنا مااعترضناش خالص على وضعك وحقك طبعا تفرح بالمنصب وتستخدمه استخدام يزهقنا ويخلينا نقدملك واجب الاعتذار علشان بنحملك مسؤلية صفه إنت ماتعرفش حاجه عنها غير اسمها ،ومش هنيجى عليك أكتر من كدا علشان انت زى ناس كتير فاكره انك نزلت من بطن الست والدتك راجل ،بس السؤال هنا ايه اللي يخليك تستخدم صفات تجيبلك الكلام واللي هتخلينى أسالك دلوقتى واقولك هو انت تعرف يعنى ايه راجل ؟! طيب تعالى كدا نعرف مع بعض ايه هي صفات الرجولة خاصة لما تيجى تمارسها على اى ست فى حياتك ، وهتتفاجىء جدا انها حجات بسيطه وسهلة الاستعمال.

حق الرجوله عليك إنك تناقش الست اللى قدامك تديها المساحه تتكلم وتعبر عن اللى جواها كبتك ليها مش رجوله ايا كان درجة قربها ليك أو بعدها عنك ، انت راجل باحتواءك ليها ، باحترامك لرأيها أيا كان سواء هتاخد بيه أو لا ، راجل يعنى تحسسها بالأمان معاك مش تبقي دايما مهددها برجولتك، راجل يعنى ماتنيمهاش يوم مكسورة الخاطر ولاتحسسها انها قليله ومش ماليه عينك ،راجل يعنى ماتخونهاش ماتقللش منها حتى لو بينك وبين نفسك، راجل يعنى تخليها ست الكل بالقول والفعل.

حق الرجوله عليك انك تخاف تعمل الغلط علشان متجرحاش ،أنك تكون اب واعى ناضح قادر تحتوى ،انك تكون اخ راجل بالافعال مش بالصفة اللي اتولدت بيها ،راجل يعنى ماتخوفهاش منك تخليها دايما مطمناك وتلجألك حتى وقت الغلط ،راجل يعنى تبقى لها ضهر وسند حنين مش شخص كل دوره فى الحياه أنه يقهرها وبس علشان يحس بنفسه.

معلش بقى انا مش موافقه على ان كل شخص اتولد ذكر يستاهل صفة الرجوله ،اللى مش هايتعب من هنا ورايح ويجتهد ويبذل أقصى ماعنده علشان يبقي مهيأ للصفه دى مانسمعوش تانى ابدا يزهقنا بجملة أنا الراجل ، ولو حاول يقولها من غير مايبقي مؤهل حقك تردى عليه فورا وتقوليله راجل بأمارة ايه؟ّ!

نداء الى كل أب وكل أم لما تيجىوا تربوا ابنكم حاولوا تفهموه الفرق مابين االرجولة وبين الوضع اللى اتولد عليه ،ونداء اخر لكل شخص لايملك صفة’الرجولة‘ أو مستكبر انه يتعب عشانها شوية أحب اقولك ان الرجوله سهله بس مستاهله وبلاش الجملة عمال على بطال علشان بيبقي شكلك وحش جدا ياعم الطاوس اللى نافش ريشة .