ورقة وقلم واكتبوا ورايا طريقة تحضير نجوم مسلسلات رمضان ،هتجيب ممثل جميل لسه ’ورور‘ كدا كان بيمثل دور تانى أو بقاله فترة مختفي وتعمله بيات شتوى فى الجيم ،هتخليه ياكل ويشرب وينام هناك مش هاتخرجه غير مايبقي فى حجم الأستاذ ياسر جلال والأستاذ أمير كراره .

نيجى للخطوه التانيه ، بعد ماهتنفخ العضله وتأفور شكل الجسم، تشوف بقى الوش محتاج إيه وتراضيه برضه ،ضرورى تبقي عادل في التقسيم ، وعلى حسب شكل الوش هتشوف ناقصه شنب ولادقن ولازم الدقن تكون مناسبة للدور يعنى كل ماكانت أطول كل ماالفنان بيركز أكتر ويعلي فى الأداء ،أما الشنب ده حكايته حكايه ده بيخليك طول الوقت فارد ضهرك كدا وحاسس بهيبه يعنى بيخليك ماشى تقول ياأرض اتهدى ماعليكى قدى.

طبعا بعد ماتحضر النجم بهذه الطريقة ضرورى تستغله الاستغلال المناسب لهذا الشكل الخطير،قوم ايه تاخده كدا على بعضه و تنزل بيه الدراما الرمضانيه يكسر ويرزع ويطير وينط ويضرب كل الناس ،وخلى بالك ماحدش يقدر يضربه ركز جدا فى الجزئيه دى النجوم اللى بالشكل ده لاتنضرب ولاتموت ، لدرجة إنى بقيت اخاف ياأخى من الاستاذ ياسر جلال الانسان ،ودايما متخيلاه هو و الاستاذ امير كراره ماشيين يضربوا فى خلق الله.

ياسر جلال من ساعة مارجع بشكلة الجديد فى مسلسل ’ظل الرئيس‘ فى رمضان 2017وهو ثابت على موقفه ، تحس كدا ان اللي شغاليين عليه إهتمامهم بينصب فى شكل جسمه ودقنه وعضلاته،مش بالمحتوى اللى هيقدمه ثلاث سنوات ومسلسلاته بتتلخص فى ضرب وتكسر وانتقام وقسوة تخليك تخاف من الفنان وتفضل الصورة الذهنيه عنه أنه واحد من نجوم المصارعه الحرة مش نجم من نجوم التمثيل.

مشكلتنا الكبيرة واللى بيرتكبها صناع الدراما انهم بيصعب عليهم يغيروا القالب للمثل ، لقوا ياسر جلال جايب فى حتة الأكشن يخلوه طول عمرة أكشن ،مايحاولوش يتعبوا عليه شويه ويغيروا فى محتوى مايقدمه زى مابيتعبوا على شكله وجسمه.

وصلنا ’لباشا مصر‘النجم أمير كراره ،أنا عندى احساس ان اللقب والدور والشنب عجبوا أمير فقرر يكمل بيهم باقي حياته، اللى محيرنى فعلا أنه لو قرر ينهى مسلسله ’كلبش ‘ويبقى ده أخر جزء ، ياترى هايعمل إيه جديد يعجب الناس،أعتقد أنه لازم ياخد راحه شويتين ويرجع بحاجه جديده تقنع الناس زى باشا مصر وياريت من غير شنب وعضلات .

الممثل من دول يلاقى الدور أو الشخصيه أو العضلات نجحت مع الناس يقوم يلزق فيها أو تلزق فيه الله أعلم ، يحلف أنه مايسيبها غير لما يزهق أو يزهقنا منها.

طيب أنا عندى سؤال لصناع الدراما،هل أمير كراره وياسر جلال لايصلحوا لتمثيل أدوار رومانسيه ؟قصص الحب هتبقي صعبه عليهم يعنى ؟! طيب هما اللى بيرفضوا مثلا وبيخرجوا طاقتهم المكبوته فى الأدوار العنيفه دى ؟ حد يفهمنا ياجماعه المشكله فين أو عند مين .

نداء الى كلا من النجم أمير كراره والنجم ياسر جلال نفسنا نشوفكم السنين الجايه بشكل مختلف أخرجوا بقى من أدوار الأكشن اللى صدقتوها دى وارجعوا ناس طبعيين ،ماتخلوش الجيم والعضلات تغيركم ،وزى مانجوم زمان كان بيعملوا أكشن كنا بنشوفهم برضه فى أدوار الحب والأدوار الإجتماعيه وغيرها من الأدوار المتنوعه ،رجعوا تاريخ أحمد رمزى ورشدى أباظه فأنتكم الأقرب الى شخصياتهم.