طمأن الفنان خالد سرحان الجمهور القلق على الزعيم عادل إمام، وذلك في مداخلة هاتفية مع الإعلامي خيري رمضان، ببرنامج حديث القاهرة، المذاع عبر شاشة قناة القاهرة والناس.

وقال خالد سرحان: أنا كنت مع الزعيم قريب جدًا، والسوشيال ميديا جننت الناس والتريند ده عمل خلل في الدنيا ومش ممكن كل صفحة عايزة تاخد كم من المشاهدة تطلع أي إشاعة عشان بيكسبوا من ورا ده دي حاجة أنا مش فاهمها سواء ده بيحصل من حد مسؤول أو مش مسؤول.
وعن سبب عدم حضور الزعين لحفل زفاف ابنة اخيه، قال: الناس بتسأل ليه الزعيم محضرش فرح بنت أخوه، أنت متخيل إنه ممكن يروح فرح فيه 2000 بني آدم هيتلموا عليه ده ممكن الفرح نفسه يبوظ، مفيش حد يحتمل.

وتابع: أستاذ عادل كويس جدًا، وهل عقلية كبيرة زي عقلية الزعيم يجيلها زهايمر يعني؟ الراجل بردو مركز وعارف وصحته بخير الحمد لله مفيش أي حاجة خالص وهو زي الفل، وساعات بيسخر من الصفحات اللي بتقول إن عادل إمام في المستشفى، فالموضوع بيقلب بسخرية لأنه كتر أوي.
وأضاف: أنا بطمن الناس على صحة الزعيم هو زي الفل، ومن حق الناس تخاف عليه لأنه في وجدان المصريين كلهم، ولكن رفقًا بالناس كفاية إشاعات هما بني أدمين بردوا وأولاده ممكن يزعلوا وأحفاده لأنهم شايفينه كويس، وكل شوية شائعات بتفّول عليه.

وقال خالد سرحان عن فيلم الواد وأبوه: فيلم الواد وأبوه ده المفروض إنه بيجمع بين الزعيم وابنه محمد ومن إخراج رامي، وهما بيحضروا له وعصام إمام هينتجه، والأستاذ عادل هيرجع إن شاء الله للشاشة، متسمعوش للشائعات السخيفة.