ودارت العركة بين الرجالة والستات بسبب ويل سميث وخد عندك بقي ياسيدي تريقه وتلقيح من الطرفين وشد وجذب ووجع دماغ وهم كبير.
ليه بقي؟
هقولك أنا ليه
لأن كلا من الطرفين يريد اثبات وجهه نظره علي حساب الآخر وحتي إن كان خطأ بالبلدي كدة أنا ده رأي وهو صح وأنت هتقتنع بيه وده طريقه الطرفين.

لأن ببساطه مهما روحنا وجينا وسوينا إحنا مش هنقدر نغير طبيعة المرأة ولا هي نفسها رغم كل المحاولات والصراع النفسي الداخلي هتقدر تغير من نفسها المرأة هي المرأة مهما بقي راحت وجت واشتغلت ونجحت وسدد في الشغل زيها زي الراجل بس في الآخر المرأة هي المرأة اللي أصلا في الأساس محتاجة احتواء وأمان وطبطبة و............. إلخ

طبيعة المرأة مش هتختلف لا بنزولها العمل ولا بنجحها ولا بأي حاجة
يعني ده حمادة وده حمادة تاني خالص

لو استطعنا بمنتهي السهولة فهم طبيعه المرأه والتفرقه بين كونها بتشتغل وناجحه بره البيت
وكونها هي ذاتها المرأه اللي جوه البيت بقي اللي محتاجه كلمه حلوه ومحتاجه حنيه واحتواء
محتاجه تكلمك في اي موضوع وتلاقيك هتحكيلك بقي هتشكيلك هترغي معاك هتقولك الحقني هتدلع عليك ماانت ياسيدي راجلها ايه المشكله في ده .

ماهو في الأساس انتوا اختارتوا بعض عشان تبقوا لبعض فطبيعي بقي يبقي عندكم وقت لبعض مش صعبه يعني نيجي بقي للشق التاني اللي زعلان اوي من فرحه الستات بموقف ويل سميث وشايف انه ياعم ويل انت فتحت علينا باب مش هيتقفل.

اللي هو الراجل وطبيعه الراجل اللي شايف ياعم الله يخليك هي لا ناقصه وجع دماغ ولا حوار هي جمله وكنا ضحكنا وخلصنا.

لا ياسيدي انت وهي الموضوع ابسط من كده بكتير دي هي كلمه بتفرق والله ، مره كلمه بسيطه مره موقف وكده يعني.

هو فيها ايه لما كل واحد فينا يبقي للتاني اللي هو عايزه بمنتهي البساطه انتوا اختارتوا بعض عشان تكونوا مع بعض ولبعض.

إيه بقي المشكله لما كل واحد فيكوا يكون للتاني اللي هو عايزه .

ماهي دي نقطه الصراع، إن الست نفسها الراجل اللي معاها يبقي ليها مش عليها فتحس بأمان والراجل نفسه يحس ان الست ده ليه مش عليه بمنتهي السهولة كونوا لبعض زي ماكل واحد فيكوا عايز التاني.

كل واحد فيكوا يكون في مكانه وفي دوره هنا هتبقي الحكايه بسيطه، أهو ويل سميث خد التريند بسبب موقف
موقف هو بقي لا صرف ولا كلف ولا خطط ولا أي حاجة لا موقف واحد ولأنه صح ولمس كل الناس ركب التريند.

الستات اللي نفسها يكون جوزها ميستحملش عليها كلمه والرجل اللي شايف ياسيدي ده كلمه يعني كبر دماغك.. نقطه ومن أول السطر.