يعني إيه..علشان أنا طيب الناس كلها بتستهيفني وتستهفيني ومش بيحترموني ومبيعملوش ليا أي حساب و يعني إيه قليل الأدب كل الناس بتخاف منهم وبيقدروهم ، للدرجة دي الأدب بقى ما لهوش أي لازمه في حياتنا ،دي شكوى بنت بتقول إن كل مشكلتها في الحياة إن أبوها وأمها ربوها تربية كويسه وياريتهم ما كانوا عملوا كده(من كلامها.) ... ياناس ياهوو. . في ناس كتير دايما بيتريقوا على أصحاب القلوب النقية وبيستغلوهم أسوأ إستغلال قال إيه تحت شعار إنهم ناس طيبين وعلى نياتهم وكأن الطيبة ارتبطت في معناها مع الهبل والعبط بدلا من وقوفنا جنبهم ومعاهم ونساعدهم.

للأسف بعضنا من الخبثاء بيقوموا بإستغلال براءتهم ونقاء قلوبهم في الاقلال والسخرية منهم وبعدين يقولوا على أنفسهم بأنهم شطار والناس الطيبين دول بأنهم اغبياء ، أحب أوجه رسالتي للي بيعتبروا أنفسهم اذكياء أنتم إللي اغبى أغبياء الارض.

إيه رائيكم نحط الامور في نصابها الطبيعي ونسمي الأشياء بمسمياتها الطبيعية إذا كنتم بتعتبروا الإنسان الطيب اهبل..وبتستغلوه فأنا بقولكم إن شطارتكم مابقاتش تعني شطارة بقت إسمها إستغلال وخبث ونداله وقلة أدب وإنعدام تربية على كل حال.. العيب عندك إنت مش عند الطيب كل سلبيات الطيب إنه وثق في إنسان خبيث.

نقاء القلب وصفاؤه ليس عيبا.. استقيموا يرحمنا ويرحمكم الله