حضرت جلسة لشاب عاوز يفسخ خطوبته ،وإنتابتني الدهشة والاستغراب ، لما لقيت الولد بيوجه كلامه لأبو البنت ،ويقوله أنا عاوز شبكتي ، وكمان عاوز كل الهدايا اللي جبتها لبنتكم ، وترجعولي كل المصاريف اللي صرفتها عليها ، في كل الخروجات في السنتين اللي فاتو ، وبيسألوني إيه رأيك يادكتور في الكلام ده وفجأة لقيت لساني اتربط ،والكلام مش عاوز يطلع وكويس اني ما اتكلمتش.

إللي أنا أعرفه إنه من حقه ياخد شبكته الدهب، لوهو إللي بايع عادي ودي مافيهاش حاجه ، وممكن الهدايا كمان ترجع برضو مفيش مشكلة ،لكن السؤال اللي محيرني وفي نفس الوقت يضحكني أنه عاوز كل اللي صرفه على بنتهم وهو كان بيخرج معاها أيام الخطوبة ، طيب نفسي أعرف ، الولد ده هيحسب الحسبة دي ازاي ،واللي يعرف ياريت يقولي ، معقول الدماغ وصلت لهذا الحد ،للدرجة دي وصل تفكير بعض الناس.

يابنات...

دققوا النظر والإختيار شوية في إللي ناويين ترتبطوا بهم ..يعني اعزمها وأنا معاها أيام الخطوبه على كوز درة وأنا على الكورنيش أقوم اطلب تمنه بعد سنتين لما افسخ ؟

لكن القضية الجوهرية والاهم هي إزاي أحاسب على سعر كوز الدرة أحاسب على سعر الجنية ولا الدولار ولا اليورو ،ولا أحاسب على سعو كوز الدرة قبل تعويم الجنية ولا بعده؟ .

والله هم يبكي وهم يضحك. صباحكم زي وشوشكم.