عمليات التجميل لما تبقى لضرورة طبية وصحية يبقى أهلا وسهلا، لكن لما يكون عمليات التجميل أحد وسائل الأنا، لمجرد حب الأنا  المتورم، وإدمان حب الظهور والاستعراض.. يبقى كده نقول لأ ولأ ولأ.. وستين لأ..

علشان كده.. ياريتك وأنت بتعملي شفط لدهون بطنك وأردافك.. ما تنسيش كمان  تعملي شفط لأفكارك العقيمة.. علشان تبقي جميلة ورشيقة بدنيا.. ومش ساذجة ولا عبيطة فكريا وعقليا.. ياريت وأنت بتعملي بوتوكس وكوليجين ونيوفيل ماتنسيش كمان تعملي حقن لأفكارك الإيجابية. 

علشان ماتبقيش جميلة وجذابة مظهريا وتافهة سلوكيا، ياريت وأنت بتزرعي خصلات لشعرك.. ماتنسيش  كمان تزرعيلك شوية طموحات مفيدة لك.. يمكن يفيدوكي شوية في حياتك إللي مليانة احباطات علشان تبقي جميلة وطموحة.

ياريت وأنت بتغيري لون جلدك وعماله ترسمي وشم هنا وتاتو هناك... ماتنسيش تغيري لون حياتك للأحسن... علشان تبقي جذابة وحياتك لها معنى... ياريت وأنت بتعملي تعديل لفكك ووجهك و أسنانك.. وتدفعي دم قلبك وتحطي فلوس الجمعية إللي عاملاها بقالك سنين علشان طقم أسنان سمايل هوليود.

ياريت ماتنسيش تعملي تعديل في أسلوب تعاملك.. مع غيرك بدون تعالي عليهم أو نفور منهم... علشان تبقي جميلة ومقبولة من اللي حواليك.. ياريت وانت بتعملي  شد لرقبتك وإزالة تجاعيد وشك.3. ما تنسيش تشدي كمان حيلك وتتخلصي من مشاكلك وعقدك

ياريت وأنت بتكبري شفايفك أو أي حاجة تانية.. ماتنسيش تكبري كمان أخلاقك ومبادئك..

ده مطلوب...وده مطلوب.. بس السؤال.. التصغير والتكبير والتنحيف والشفط والحقن.. معروف مكانهم فين..  في كل مكان ممكن تلاقيه.. لكن ياترى فين المكان.. اللي ممكن نشفط  فيه أفكارنا السيئة.. ونكبر فيه مبادئنا القيمة، وننحف فيها انفعالاتنا إللي بنكبرها وبنهولها على الفاضي، ونحقن فيه عقولنا بالأفكار الجيدة.